वीरगंज । पर्सा क्षेत्र नम्बर १ का प्रतिनिधी सभा सदस्य प्रदीप यादवले केन्द्र सरकारले वीरगन्जसहित मधेससंग अहिलेपनि विभेद गरिरहेको बताएका छन् ।वीरगन्जमा अहिले देखिएको पानीको संकटबारे वीरगन्ज महानगरपालिकाले बिहीबार आयोजना गरेको छलफल कार्यक्रममा बोल्दै पुर्व वनमन्त्री समेत रहेका यादवले यस्तो बताएका हुन् । वीरगन्जसहित मधेसमा अहिले भइरहेको पानीको संकट बारे आफुले संसदमा पटक पटक आवाज उठाएको साथै प्रधानमन्त्रीसमेतलाई भेटेर ध्यानाकर्षण गराउँदा समेत संघ सरकार समस्या समाधानका लागि पहल गर्नुको सट्टा कानमा तेल हालेर बसेको गुनासो उनले गरे । उनले भने,‘ वीरगन्जसहित मधेसमा अहिले पानीको हाहाकार छ , वीरगन्जवासी एक एक बुन्द पानीका लागि तड्पीरहेका छन् ,वीरगन्जसहित मधेसमाथि यत्रो बज्रपात पर्दापनि संघ सरकार कानमा तेल हालेर बसेको छ , आजपनि मधेसलाई हेर्ने संघ सरकारको नजर विभेदकारी छ ।
कार्यक्रममै सहभागी खानेपानी महेन्द्र राय यादवलाई सुनाउदै पुर्व वनमन्त्री यादवले वीरगन्जस्थित खानेपानी संस्थानको कार्यालयमा तत्काल जनशक्ति थप गरिदिन अनुरोधपनि गरे । साथै उनले वीरगन्जसहित मधेसभर देखिएको पानीको समस्या दीर्घकालिन रुपमा समाधानका लागि खानेपानी मन्त्रालयसंग के के योजना छ ? भनेर खानेपानी मन्त्री यादवसंग प्रश्नपनि उनले गरे । मन्त्रीस्तरीय निर्णयबाट मधेस प्रदेशलाई ‘ सुख्खाग्रस्त क्षेत्र’ घोषणा गरेर यहाँका जनतालाई राहत दिन उनले आग्रह गरे ।पुर्व वनमन्त्री यादवले मधेसलाई मरुभूमी बनाउने योजना तहत संघ सरकारले चुरे क्षेत्रको दोहन र वन विनाशमा लागेको आरोप पनि लगाए ।उनले भने,‘ जबसम्म चुरेको संरक्षण हुन सक्दैन तबसम्म मधेसको समस्या समाधान हुन सक्दैन तर सरकार मधेसलाई मरुभूमी बनाउन लागिपरेको छ ।
यसका विरुद्ध सबै मधेसी एकजुट भएर लाग्नुपर्छ । महानगरका मेयर राजेशमान सिंहको अध्यक्षतामा भएको उक्त छलफल कार्यक्रममा पर्सा क्षेत्र नम्बर २ का प्रतिनिधी सभा सदस्य अजय चौरसिया, प्रदेश सभा सदस्यहरु श्याम पटेल र प्रमोद जयसवाल , जिल्ला समन्वय समिति पर्साका प्रमुख अजय सर्राफ ,संविधानसभा सदस्य अजय द्विवेदी , वीरगन्ज महानगरपालिका उपमेयर इम्तियाज आलम , पर्साका प्रमुख जिल्ला अधिकारी हिरालाल रेग्मी , नेपाली कांग्रेसका महानगर सभापति मणिन्द्रलाल श्रेष्ठ , जनता समाजवादी पार्टीका महानगर अध्यक्ष इश्वरचन्द्र यादव, वीरगन्ज महानगरपालिकाका प्रमुख प्रशासकीय अधिकृत लक्ष्मी प्रसाद पौडेलका साथै महानगरका ३२ वटै वडाका वडाअध्यक्ष , राजनीतिक दलका नेता लगायतको सहभागीता थियो ।
