वीरगंज । भारतको मणिपुर राज्यमा झण्डै तीन महिनायता कुकी जनजाति र मैतेई समुदायबीच हिंस्रक द्वन्द्व चलिरहेको छ । क्रिश्चियन कुकी र हिन्दु मैतेईबीचको यस द्वन्द्वमा सयभन्दा बढीको मृत्यु भइसकेको छ भने ५० हजारभन्दा बढी विस्थापित भएका छन् । मणिपुरको हिंसा टर्न नपाउँदै यतिबेला फेरि भारतकै हरियाणा राज्यमा पनि हिन्दु र मुस्लिम समुदायबीच अर्को हिंस्रक द्वन्द्व छेडिएको छ । एकपछि अर्को यस्तो अप्रिय घटनाक्रमले भारतमा साम्प्रदायिक हिंसाको आगो दन्किएको आभास भएको छ ।

गत सोमबार हरियाणाकाे नुह जिल्लामा हिन्दु राष्ट्रवादी समूहहरू बजरङ्ग दल र विश्व हिन्दु परिषद्ले आयोजना गरेको एउटा धार्मिक यात्राका क्रममा भिडन्त भएको थियो । धार्मिक यात्राका क्रममा स्थानीय मानिसहरूले धार्मिक यात्राका गाडीलाई ढुंगामुढा गरेपछि यो द्वन्द्व सुरु भएको हो । यतिबेला यो घटनामा हालसम्म चार जनाको मृत्यु भइसकेको छ भने २० जना घाइते भएका छन् । हरियाणामा सुरु भएको द्वन्द्वका कारण हिन्दु समुदायको भिडले सोमबार राति नै दिल्लीनजिकै रहेको गुरुग्रामस्थित एउटा मस्जिदमा आगजनी गर्दै मस्जिदका इमामको हत्या गरिदिएका छन् । मस्जिदका इमाम मोहम्मद सादको हत्या भएको हो ।

सोमबारको द्वन्द्वपछि दुवै समुदायको भिडले दर्जनौँ सवारीसाधन र स्थानीय पसलहरूमा तोडफोडसमेत मच्चाएका छन् । देशमा साम्प्रदायिक हिंसाका घटनाहरू भड्किएसँगै विपक्षी पार्टीहरूले भारतीय जनता पार्टीको सरकारले देशमा शान्ति र स्थायित्व कायम गर्न नसकेको भन्दै असन्तुष्टि व्यक्त गरेका छन् । दुई समुदायबीच हिंस्रक भिडन्त भएपछि यतिबेला हरियाणाका शहरमा कर्फ्यु लगाइएको छ । साम्प्रदायिक हिंसा फैलिएका स्थानमा ठूलो सङ्ख्यामा सुरक्षाकर्मीहरू खटाइएको छ । सरकारले त्यहाँ बुधबारसम्म इन्टरनेट बन्द गरिदिएको छ । हरियाणामा सुरु भएको द्वन्द्वले भारतका मुस्लिम र हिन्दु समुदायबीच झनै खाडल खन्न सक्ने आशंका गरिएको छ ।