वीरगंज । संघीय सरकारका युवा तथा खेलकुद मन्त्री डिग बहादुर लिम्बुले ११ औँ राष्ट्रिय खेलकुद प्रतियोगिता वीरगन्जसहित मधेस प्रदेशमा गर्ने तयारी भइरहेको बताएका छन् ।शनिबार वीरगन्जमा वीरगन्ज उद्योग वाणिज्य संघले आयोजना गरेको अन्तरक्रिया कार्यक्रममा बोल्दै मन्त्री लिम्बुले यस्तो जानकारी गराएका हुन् ।राष्ट्रिय खेलकुद प्रतियोगिता वीरगन्जसहित मधेस प्रदेशमा आयोजना गर्दा यहाँ देशैभरिबाट खेलाडी, प्रशिक्षक र खेलप्रेमीहरु आउने र त्यसले यहाँको आर्थिक गतिविधी बढ्नुका साथै व्यपार व्यवसायपनि चलायमान हुने मन्त्री लिम्बुले बताए ।वीरगन्जसहित समग्र मधेसको समृद्धीका लागि खेल क्षेत्रको प्रवद्र्धन गरेर पर्यटन व्यवसायलाई बढावा दिनुपर्नेमा उनले जोड दिए ।
वीरगन्जको नारायणी रंगशालाको जीर्णेद्धारका लागि आफु गम्भिर भएको बताउँदै उनले अर्थमन्त्री र प्रधानमन्त्रीलाई पनि ध्यानाकर्षण गराई आवश्यक पहल गर्ने प्रतिबद्धता जनाए।नारायणी रंगशाला र गौतम मावि छेउको जग्गामा कबर्ड हल बनाइदिने प्रस्ताव गौतम स्कुलले गरेको जानकारी गराउँदै मन्त्री लिम्बुले यसका लागि सरोकारवालाले छलफल गरेर आवश्यक निष्कर्षमा पुग्न सकिने धारणा राखे । कार्यक्रममा वीरगन्ज उद्योग वाणिज्य संघका अध्यक्ष अनिल अग्रवालले वीरगन्जलाई राज्यले उपेक्षा गर्दै आएको गुनासो गरे । उनले भने, ‘यहाँका जति पनि खेलाडी छन्, उनीहरु आफ्नै मेहनत र आफ्नै लगानीबाट स्थापित भएका छन् । तर राज्यले कुनै पनि लगानी यहाँका खेलाडीको प्रोत्साहनका लागि गरेको छैन ।’
मधेस प्रदेशबाट दक्ष खेलाडी उत्पादन गर्न सकिने भएपनि राज्यको नजर पर्न नसकेकोप्रति उनले दुखेसो पोखे । आदर्शनगर रंगशाला र नारायणी रंगशालामा ठूलाठूला खेलहरु आयोजना गर्न सकिने बताउँदै उनले आदर्शनगरस्थित स्विमिङ् पुलमा अन्तर्राष्ट्रिय स्तरका पौडी प्रतियोगीता गर्न सकिने भएपनि व्यवस्थापनका कारण ओझेलमा परेको बताए ।कार्यक्रममा प्रदेश सभा सदस्य श्याम पटेल, वीरगञ्ज उद्योग वाणिज्य संघका बरिष्ठ उपाध्यक्ष हरि गौतम, वीरगञ्ज उद्योग वाणिज्य संघका उपाध्यक्ष माधब राजपाल, कांग्रेसका क्षेत्रीय सभापति अरविन्द गुप्ता, कांग्रेसका नगर सभापति मणिन्द्रलाल श्रेष्ठ नेपाली लगायतकोपनि उपस्थिती थियो ।
