वीरगंज । वीरगन्ज महानगरपालिका वडा नम्बर १४ का स्थानीयले पाँचदिन भित्र आफनाे वडामा पानीको समस्या वडाका जनप्रतिनिधिले समाधान नगरे आन्दोलनमा उत्रिने चेतावनी दिएका छन् । वीरगन्ज महानगर र यस आसपासका क्षेत्रमा केहि दिन यता चापाकल लगायतका पानीका श्राेत सुकेर पानीको हाहाकार भएकाे छ । जसका कारण महानगरवासीकाे जनजिवन नै कष्टकर बनेकाे छ ।

बिहीबार नेपाली कांग्रेसका बुथ सभापति बिश्वेसर प्रसाद कुर्मीकाे नेतृत्वमा स्थानीयवासीले वडा नम्बर १४ काे वडा कार्यालयमा पुगेर वडाअध्यक्ष महबुब एलाही अन्सारीलाई ज्ञापनपत्र बुझाउदै पानीको समस्या समाधानकाे लागि माग गरेका हुन् ।

ज्ञापनपत्र बुझाइएकाे पाँच दिनभित्र वडामा पानीको समस्या समाधान नगरिए सम्पुर्ण वडावासी नै सशक्त आन्दोलनमा उत्रिने चेतावनीसमेत दिइएकाे कांग्रेस बुथ सभापति कुर्मीले बताए । वडाभरिका चापाकलहरु सुक्र पानी आउनै छाडेपछि वडामा पानीको हाहाकार हुदाँ समेत वडाका जनप्रतिनिधिहरुले चासाे नलिएपछि बिहीबार ज्ञापनपत्र बुझाइएको कुर्मीले बताए ।