वीरगंज । ५ महिनाको अन्तरालपछि नेपाल तथा भारतका सीमावर्ती बजारहरूमा फेरि भारतीय रुपैयाँ (भारु)को तुलनामा नेपाली रुपैयाँ (नेरु) बलियो भएको छ । दुई सातायता वीरगन्ज र सीमावर्ती भारतीय बजार रक्सौलमा समेत नेपाली रुपैयाँको तुलनामा भारतीय रुपैयाँ कमजोर भएको हो ।

वीरगन्जका व्यापारीहरूले हाल पनि ग्राहकबाट सकेसम्म भारु लिन मानिरहेका छैनन् । सामान्य अवस्थामा सबैभन्दा बढी भारु लेनदेन हुने वीरगन्जका प्रायः सबै पेट्रोल पम्पले अहिले सूचना नै टाँसेर भारु नलिने बताएका छन् । भारत सरकारले हालै २ हजार दरको भारु नोटबन्दी गरेपछि पनि वीरगन्जका व्यापारीहरू भारुमा विनिमय गर्न हच्किएको हुन सक्ने वीरगन्ज उद्योग वाणिज्य संघका वरिष्ठ उपाध्यक्ष हरि गौतम बताउँछन् ।

‘स्थिति सामान्य हुँदा वीरगन्जका व्यापारीहरूका लागि भारु आकर्षण नै हुन्थ्यो,’ उनले भने, ‘तर हाल रक्सौलमै भारु कमजोर भएको छ, त्यसमाथि भारु २ हजारको नोटलाई भारत सरकार आफैंले बजारबाट फिर्ता लिने घोषणा गरिसकेको छ । त्यसैगरी भारुका अन्य दरका नोट पनि भारत सरकारले बजारबाट फिर्ता लिने घोषणा अचानक गर्न सक्ने त्रासले भारु नोट लिन व्यापारीहरू हच्किएका हुन सक्छन् ।’ हाल वीरगन्ज र रक्सौलमा १ सय रुपैयाँ भारुको मूल्य १ सय ५५ नेपाली रुपैयाँसम्म झरेको छ । सामान्य अवस्थामा १ सय भारुको नेपाली मूल्य १ सय ६० रुपैयाँ हुने गर्छ ।