रौतहट । कुमार चन्दन । नेपाल पत्रकार महासंघका केन्द्रीय अध्यक्ष विपुल पोखरेलले नेपाल पत्रकार महासंघलाई सक्रिय पत्रकारहरुको संस्था बनाउन खोजेको बताएका छन् । केन्द्रीय अध्यक्ष पोखरेलले महासंघको जिल्ला शाखा स्थापनामा विभिन्न क्षेत्रका मानिसहरुको सहयोग रहेको भए पनि अहिले सक्रिय संचारकर्मीको संस्था बनाउनमा जोड दिइएको बताएका छन् । नेपाल पत्रकार महासंघ रौतहट शाखाद्वारा गरुडामा आयोजित स्व. मनोज चौधरी स्मृति पत्रकारिता पुरस्कार राससका अध्यक्ष धर्मेन्द्र झालाई २५ हजार रुपैया र सम्मानपत्र हस्तान्तरण गर्दै पोखरेलले देशभर शुद्धिकरणको अभियान चलाइएको जानकारी गराएका छन् ।
पत्रकारिता क्षेत्रमा सक्रिय नरहेकालाई शुद्धिकरण अभियानमा सहभागी हुन पोखरेलले आह्वान गरेका छन् । कार्यक्रममा गरुडा नगरपालिकाका नगर प्रमुख कन्थमनि प्रसाद कलवारसहित विभिन्न विशिष्ट व्यक्तिहरु मन्तब्य व्यक्त गर्दै पत्रकार मनोजकुमार चौधरीको पत्रकारिता क्षेत्रमा रहेको योगदानको प्रशंसा गर्नु भएको थियो । पत्रकार चौधरी रेडियो मधेस मसला एफएमको स्टेशन म्यानेजर हुनु हुन्थ्यो । रौतहटका सक्रिय पत्रकार मनोज चौधरीको कोरोनाको कारण देहान्त भएको थियो । चौधरीको निधन भएपछि नेपाल पत्रकार महासंघ रौतहट शाखाले स्वास्थ्यको क्षेत्रमा कलम चलाउने एक सक्रिय पत्रकारलाई दिने गरी पत्रकारिता पुरुस्कारको स्थापना गरेको थियो ।
पुरस्कारको पहिलो संस्करण गोरखापत्रकर्मी तथा नेपाल पत्रकार महासंघ रौतहट शाखाका संस्थापक अध्यक्ष कुमार विवेकानन्द मिश्रलाई प्रदान गरिएको थियो । पुरस्कार ग्रहण गर्दै रासस अध्यक्ष झाले पत्रकारितालाई आचरणको रुपमा लिनुपर्ने बताएका छन् । शाखा अध्यक्ष प्रेमचन्द्र झाको अध्यक्षतामा भएको कार्यक्रममा पत्रकारिता क्षेत्रसित सम्बन्धित विभिन्न संघसंस्थाको प्रतिनिधिकाका साथै स्व. मनोज चौधरीकी धर्मपत्नी तथा गरुडा नगरपालिका उपप्रमुख पुनमकुमारी चौधरीको उपस्थिति रहेको थियो ।
