वीरगन्ज | स्थानीय तहले गरेको सरुवाको विरोधमा पर्साका सामुदायिक विधालयमा कार्यरत शिक्षकहरु सोमबारदेखि धर्नासहितको आन्दोलनमा उत्रिएका छन् ।नेपाल शिक्षक महासंघ पर्साको आह्वानमा जिल्लाभरका शिक्षकहरुले सोमबारदेखि धर्नासहितको आन्दोलन सुरु गरेका हुन् । पहिलोदिन आइतबार विद्यालयमा हातमा कालोपट्टी बाँधेर पठनपाठन गराएका शिक्षकहरुले सोमबारदेखि भने वीरगन्ज महानगरपालिकाको कार्यालयमा धर्नासहितको प्रदर्शन गरेका हुन् । मंगलबारपनि वीरगन्ज महानगरपालिका कार्यालय अगाडि धर्ना बस्ने आन्दोलनको कार्यक्रम रहेको नेपाल शिक्षक महासंघ पर्साका अध्यक्ष तिर्थराज यादवले जानकारी दिए । मंगलबारसम्म पनि आफूहरुको माग सम्बोधन नभए धर्ना स्थलबाटै आन्दोलनको स्वरूप परिवर्तन गर्ने यादवले चेतावनी दिए ।
वीरगन्ज महानगरपालिकासहित जिल्लाका सबै स्थानीय तहले विगत केही महिनादेखि प्रधानाध्यापक, शिक्षक, बालविकास शिक्षक तथा विद्यालय कर्मचारीहरु समेतलाई विभिन्न पूर्वाग्रह, दुराग्रह, राजनैतिक आस्था र भेदभाव गरेर सरुवा गरेको तथा पालिका प्रमुखहरुले स्वेच्छाचारी रुपमा बढुवा घटुवा गर्दा शिक्षकहरुको मानमर्दन भएकाले त्यसैको विरोधमा जिल्लाभरका शिक्षकहरु आन्दोलित भएको उनले बताए ।
प्रचलित संघिय शिक्षा ऐन र नियमावली तथा स्थानीय ऐन नियमावलीको वरखिलाफ कुनै पनि शिक्षक वा विद्यालय कर्मचारीको सरुवा नगर्न, सरुवाको लागि नभई अर्थात कोही व्यक्ति विशेषको इच्छा, आकांक्षा, स्वार्थ अथवा राजनैतिक आवश्यक्ता पूर्तिको लागि दवावको भरमा सरुवा गर्ने कार्य नगर्न, शिक्षकलाई सम्मानित पेशाकर्मीको रुपमा राखी राख्नको लागि शिक्षकको मार्यादालाई उच्च बनाउन आवश्यक कार्यक्रम ल्याउन लगायतको माग राख्दै आफूहरु आन्दोलनमा उत्रिएको अध्यक्ष यादवले बताए ।