वीरगञ्ज । वीरगञ्जलाई नयाँ पुस्ताले चाहेको जस्तै शहर बनाउने बाटोमा आफूहरु अग्रसर रहेको महानगर प्रमुख राजेशमान सिंहले बताएका छन् । रेडियो वीरगञ्जले सोमबार आयोजना गरेको ‘नयाँ पुस्तासँग मेयर’ संवाद कार्यक्रमलाई सम्बोधन गर्दै प्रमुख सिंहले आफ्नै कार्यकालमा महानगरको मुहार परिवर्तन गर्ने प्रतिबद्धता जनाए । सिंहले भने, ‘तपाई जस्तै युवाहरु नै मेरो ऊर्जाको स्रोत हुनुहुन्छ । तपाईहरुको साथ र सहयोग पाएँ भने महानगरलाई सभ्य, सुन्दर र घुम्न लायक बन्नमा कुनै समय लाग्दैन ।’ महानगरले अहिलेसम्म गरेका कामहरुको मूल्याङ्कन गर्दै आवश्यक सुझावसहित त्रुटीहरु औँल्याइदिन पनि उनेल आग्रह गरे । सहभागी युवाहरुको जिज्ञासा मेटाउँदै महानगर प्रमुख सिंहले भने, ‘बाल उद्यान पार्क र परवानीपुरको विपश्यना पार्कलाई मनमोहक बनाउँदै नि:शुल्क प्रवेश गर्न पाइने बनाइनेछ । कुनै पनि किसिमको शुल्क तिर्नु नपर्ने गरी काम भइरहेको छ । पार्कलाई व्यवस्थित बनाई हेर्न र घुम्न लायक बनाउने तयारी भइरहेको छ ।’ उनकाअनुसार वीरगञ्जको मितेरी पूलदेखि परवानीपुरसम्म घुम्ने र रमाउने खालका स्थानहरु निर्माणको अन्तिम तयारीमा छ । मुख्य सडक मात्रै नभएर गल्ली र अन्य स्थानका सबै सडकहरुलाई सुन्दर बनाउने महानगरको योजना रहेको पनि मेयर सिंहले सुनाए ।

महानग अन्र्तगतका चार वटा सामुदायिक विद्यालयमा पूर्ण रुपमा अङ्ग्रेजी माध्यम लागू गरिएको बताउँदै उनले नयाँ शैक्षिक सत्रदेखि शिक्षा क्षेत्रको सुदृढीकरणमा महानगर लागि परेको पनि जानकारी दिए । यसअघि शुल्क तिरेर पढ्नुपर्ने अङ्ग्रेजी माध्यमलाई महानगरले नि:शुल्क बनाएर सबैले पढ्न पाउने व्यवस्था गरेको भन्दै उनले आउँदा शैक्षिक सत्रबाट अन्य विद्यालयलाई पनि यस्तै परिमार्जन गर्दै लैजाने गरी गृहकार्य भइरहेको बताए । यात्रुबाहक बस लगायतका सार्वजनिक सवारी साधनमा पनि विद्यार्थीहरुलाई परिचय पत्रका आधारमा छुटको व्यवस्था गर्नका लागि महानगरले सरोकारवालाहरुसँग छलफल गर्ने र विद्यार्थीको सहजताका लागि आवश्यक काम गरिने स्पष्ट पारे ।

सिमित साधन स्रोतमा काम गर्नु पर्ने बाध्यता रहेको सुनाउँदै उनले अपेक्षा अनुसारको काम गर्न यो साधन स्रोतमा केही समय भने चाहिने बताए । ‘हामीसँग स्रोत साधन एकदम सिमित छ, त्यसैले अपेक्षा अनुसारको काम गर्न असहज भए पनि वीरगञ्जबासीलाई निराश बनाउने छैन । जुन आशा र भरोसाका साथ मलाई मत दिनुभएको थियो, त्यहीअनुरुप वीरगञ्ज र वीरगञ्जबासीको विकासका लागि म सँधै कटिबद्ध छु,’ उनले भने । सरसफाईमा कसैसँग सम्झौता नगर्ने सिंहले पुरानै अडानलाई फेरी दोहोर्‍याए ‘जितपुरको ललका पूल कट्ने बित्तिकै सभ्य हुने हामी वीरगञ्जमा जथाभावी फोहोर फाल्छौ । असभ्य भइहाल्छौ,’ उनले भने, , ‘त्यसैले कृपया महानगरलाई सुन्दर र सफा बनाउने अभियानमा हातेमालो गर्नुहोस, जथाभावी फोहोर नगर्नुहोस् ।’

कर्यक्रममा सहभागि नयाँ पुस्ताका सुमित क्यालले महानगर प्रमुखमा सिंह निर्वाचित भएदेखि धेरै सुधार र विकासका काम भएको बताए । क्यालले भने, ‘अहिलेसम्मको प्रगती सन्तोषजनक छ, तर यहाँ घुम्ने र रमाउने खालका ठाउँहरुको अभाव छ । विदाको दिन हामीलाई अहिले पनि हेटौडाको त्रिखण्डी, चितवनको सौराहा लगायतका ठाउँमा पुग्नुपर्छ । यसको अन्त्यका लागि पहल गरियोस् ।’ कार्यक्रममा सहभागी आशिका शर्माले वीरगञ्ज ब्रह्म चोक पछाडिको क्षेत्रमा फोहोर उठाउने ट्याक्टर तथा सफाईकर्मीहरु नपुगेको गुनासो गरे । वीरगञ्जको पावरहाउसका शिशिर झाके सडक लगायत विभिन्न सार्बजनिक स्थानहरुमा डस्टबिन राख्नुपर्ने आवश्यक्ता खट्किएको बताए ।

विद्यालयको शूल्कमा एकरुपता ल्याउनुका साथै शूल्क नदिँदा विद्यालयले दुव्र्यवहार गर्ने गतिविधिप्रति सुधार गर्नुपर्ने आर्यन साहको सुझाव थियो । त्यस्तै अर्का युवा श्याम गुप्ताले वीरगञ्जमा पनि पढ्दै कमाउँदै सकिने खालको वातावरण निर्माण गर्नुपर्ने आवश्यक्ता औँल्याए । त्यस्तै अशोकबाटीकाकी प्रिति पाण्डेले महानगरले सिर्सिया (सरिस्वा) नदिलाई सफा बनाउने अभियान चालेकोमा खुशी व्यक्त गर्दै अब आउने छठ पर्वमा सफा नदिमा पूजा गर्न पाउने अपेक्षा व्यक्त गरिन् । उच्च शिक्षाका लागि बाहिरिने विद्यार्थीको संख्या बढ्दै गएकोप्रति चिन्ता व्यक्त गर्दै स्थानीय ध्रुबराज पराजुलीले वीरगञ्जमै टिकाउने खालका कार्यक्रम ल्याउन आग्रह गरे । विभिन्न स्थानमा रहेका नालालाई कभर गर्नुपर्ने र सिर्सिया पूलमा सेफ्टि बेरियर र लाईट राख्न पनि उको आग्रह थियो । कार्यक्रममा वीरगञ्ज पब्लिक कलेजका संस्थापक निर्देशक एवम् मधेश विश्वविद्यालयका उपकुलपति प्रा. डा. दीपक शाक्यलगायतको उपस्थिति थियो । कार्यक्रमको सञ्चालन सञ्चार उद्यमी धूर्व साहले गरेका थिए ।