वीरगन्ज । ठोरी गाउँपालिका–३ स्थित शिकारीबास गाउँ दुई सातादेखि उज्यालिएको छ । वैकल्पिक ऊर्जा प्रवर्द्धन केन्द्रको लगानीमा सोलारमार्फत विद्युतीकरण गरिएपछि स्थानीयले राहत महसुस गरेका छन् । स्थानीय युवा जीतेन्द्र चौधरीले बिजुली बत्तीले गाउँ उज्यालिएपछि साँझपख वन्यजन्तुको डर समेत हटेको बताए । ‘अब साँझ परेपछि डर लाग्दैन, गाउँ उज्यालिएर स्वर्गजस्तो भएको छ,’ उनले भने ।
चितवन र पर्सा राष्ट्रिय निकुन्जको सीमामा घना जंगल बीच रहेको यो मानव बस्तीमा सौर्य ऊर्जाबाट २३ किलोवाट बिजुली उत्पादन गरेर यहाँका ५२ घरधुरीलाई बिजुली उपलब्ध गराइएको छ । गाउँको वरिपरि रहेका २५ वटा विद्युत पोलमा साँझ ६ बजेदेखि स्वचालित रुपमा बत्ती बल्ने गर्छ । ठोरी गाउँपालिका सौर्य मिनी ग्रेट आयोजना उपभोक्ता समितिका अध्यक्ष शिवजनम चौधरीले ठेकेदार सनसाइन इनर्जी कम्पनीले यो परियोजना निर्माण गरेको बताए । सौर्य ऊर्जाबाट उत्पादित बिजुली सबै घरधुरीले बत्ती बाल्ने, टीभी र फ्रिजसम्म चलाउन सक्छन् ।
कुल १ करोड ५९ लाख ११ हजार ९ सय १७ रुपैया बजेटको यो कार्यक्रममा उपभोक्ता समितिले १० प्रतिशत लगानी गर्नुपर्नेमा ठोरी गाउँपालिकाको कार्यालयले उक्त रकम लगानी गरिदिएको छ । ठोरी गाउँपालिको वडा नम्बर ३ का अध्यक्ष शम्भु खड्काले लामो प्रयास पछि यो परियोजना सफल हुन सकेको बताए । वीरगन्ज–ठोरी हुलाकी सडकस्थित ब्रम्हानगरबाट करिब ७ किलोमिटर पूर्व घना जंगलको बाटो छिचोल्दै यो गाउँ पुग्न सकिन्छ । गाउँ पुग्ने सडक जीर्ण छ भने शिक्षा, स्वास्थ्य, खानेपानी जस्ता सुविधा छैनन् । वन्यजन्तुले बालीनाली नष्ट गर्ने समस्या वर्षौदेखि रही आएको छ।