वीरगञ्ज | वीरगञ्ज उद्योग वाणिज्य सङ्घका निवर्तमान अध्यक्ष डा. सुबोधकुमार गुप्ता नेपाल उद्योग वाणिज्य महासङ्घ अन्तर्गत गठित व्यापार समितिको सभापतिमा मनोनयन हुनु भएको छ ।

नेउवामहासङ्घको यहि बैशाख ३ गते बसेको पहिलो कार्यकारिणी समितिको बैठकले अध्यक्षलाई अख्तियारी प्रदान गरे बमोजिम डा. गुप्ता नेउवामहासङ्घको व्यापार समितिको सभापतिमा मनोनयन हुनु भएको हो ।
नेपाल उद्योग वाणिज्य महासङ्घ अन्तर्गत गठित समितिहरु मध्ये एक महत्वपूर्ण समितिको रुपमा रहेको व्यापार समितिको सभापतित्वमा डा. सुबोधकुमार गुप्ताको मनोनयनले यस क्षेत्रमा रहेका व्यापार सम्बन्धी मुद्दाहरुलाई नेउवामहासङ्घ मार्फत् राष्ट्रिय मुद्दाका रुपमा रुपान्तरण गरी समाधानको लागि पहल गर्न सहज भएको कुरा वीउवासङ्घका अध्यक्ष अनिलकुमार अग्रवाल बताउनुभयो ।

व्यावसायिक क्रियाकलापमा पछिल्ला केही समयदेखि आएको शिथिलता, संकुचित हुँदै गइरहेको आन्तरिक बजार, बैंक तथा वित्तीय संस्थाहरुका नियन्त्रणात्मक भूमिका र बढ्दो ब्याज दरले थिलथिलो भएको वाणिज्य क्षेत्रलाई तत्काल गतिशील र जीवन्त बनाउने दिशामा सरकार तथा सरोकारवाला क्षेत्रसँग समन्वयकारी भूमिका निर्वाह गर्ने तर्फ आफ्नो भूमिका केन्द्रित रहने एक भेटका अवसरमा डा. गुप्ताले बताउनुभयो ।

नेपाल चामल दाल तेल सङ्घका केन्द्रीय अध्यक्ष समेत रहनु भएका डा. गुप्ता नेउवामहासङ्घमा दोस्रो पटक केन्द्रीय सदस्यमा निर्वाचिन भई व्यापार समितिको सभापतित्वको पद भार ग्रहण गर्नुभएको हो ।