महोत्तरी । मधेश प्रदेशको महोत्तरी जिल्लास्थित बलवा नगरपालिकामा उपप्रमुख र प्रमुख प्रशासकीय अधिकृत विच विवाद उत्पन्न भएको छ । बलवाकी उपप्रमुख रामदुलारी ठाकुरले आफूमाथि बोत्तल प्रहार गरेको प्रमुख प्रशासकीय अधिकृत प्रमोदकुमार ठाकुरले आरोप लगाएका छन् भने अधिकृत प्रमोदकुमारले आफूलाई मुक्काले हिर्काउन खोजेको उपप्रमुख रामदुलारीले आरोप लगाएकी छन् । अधिकृत प्रमोदकुमारका अनुसार उपप्रमुख रामदुलारीले आफ्नै कार्यकक्ष भित्र एक गैरसरकारी संस्थाका प्रतिनिधिहरुको उपस्थितिमा चलिरहेको छलफलका क्रममा आफूमाथि बोत्तलले प्रहार गरेको बताएका छन् । यता, उपप्रमुखले अधिकृत प्रमोदकुमारले आफूलाई मुक्काले हिर्काउन खोजेको बताएकी छन् ।
बलवा–७ बनौटामा निर्माण भइरहेको सडकको विषयमा दुवै विच विवाद हुँदा उनीहरुले यस्तो आरोप लगाएको बुझिएको छ । अधिकृत प्रमोदकुमारका अनुसार उनले स्थानीयहरुक मागअनुसार सडकको काम रोक लगाएपछि उपप्रमुख रामदुलारीले त्यसलाई इस्यू बनाएर आफूसँग दुर्व्यवहार गरेको बताएका छन् । अधिकृतले उपप्रमुखको योजनाअन्तर्गत रहेको सो सडक २५ लाखको लागतमा निर्माण भइरहेको अवस्थामा स्थानीयले ९ फिट मात्र नभई १४ फिट सडक निर्माण गर्नुपर्ने माग गर्दै कार्यालयमा लिखित जानकारी दिँदा आफूले काम रोक्न लगाएको बताए । उनले स्थानीयको मागलाई ध्यानमा राख्दै काम रोकिएको र सोही कुरालाई इस्यु बनाएर उपप्रमुखले आफूलाई दुर्व्यवहार गरेको सुनाए ।
यता, उपप्रमुख रामदुलारीले आफूले प्रमुख प्रशासकीय अधिकृतमाथि बोतल प्रहार नगरेको दाबी गरेकी छन् । उनले भनिन्, ‘मैले प्रमुख प्रशासकीय अधिकृतलाई बोलाएर ल्याउन कार्यालय सहयोगीलाई ३ पटक उनको कार्यकक्षमा पठाएँ । तरपनि उहाँ आउनु भएन । मैले पटक पटक फोन गर्दा फोन उठाउनु भएन ।’ अगाडि भनिन्, ‘उहाँ नआएपछि म आफैं उहाँको कार्यकक्षको गेटमा पुगेर कृपया यहाँ आउनुस् मलाई तपाईंसँग कुरा गर्नुछ भन्दा उल्टै तपाईंसँग म कुनै कुरा गर्न चाहँदिन भनेर मेरो अपमान गर्नुभयो ।’ सोही क्रममा सामान्य भनाभन भइरहँदा प्रमुख प्रशासकीय अधिकृत प्रमोदकुमारले नै आफूमाथि मुक्का प्रहार गर्ने प्रयास गरेको आरोप लगाइन् । उनले मुक्का प्रहार गर्नै लाग्दा स्वयंलाई बचाउन आफूले त्यहाँ नजिकै रहेको पानीको बोतल मात्रै उठाएको बताइन् । तर, आफूले सो बोतल प्रमुख प्रशासकीय अधिकृतमाथि प्रहार भने नगरेको उनको दाबी छ ।