वीरगंज । नेपाली कांग्रेसका नेता डाक्टर शेखर कोइरालाले लोकतन्त्र प्राप्तिका लागि भएका आन्दोलनमा मजदुरहरुको महत्वपूर्ण योगदान रहेको बताएका छन् । वीरगन्जमा आइतबार नेपाल यातायात मजदुर संघको ७ औं महाधिवेशनको उद्घाटन समारोहलाई सम्बोधन गर्दै कांग्रेस केन्द्रिय सदस्य समेत रहेका कोइरालाले तर सत्तामा पुग्दा भने दलहरुले श्रमिकको मुद्धालाई बिर्सिने गरेको बताए । कांग्रेस पार्टीको जन्मदाता मजदुर श्रमिक नै भएपनि सत्तामा पुग्दा कांग्रेसले मजदुर श्रमिकलाई बिर्सिने गरेको कोइरालाको भनाई थियो ।

कोइरालाले भने,‘ कांग्रेस पनि जब जब सत्तामा पुग्छ मजदुरहरुको मुद्धालाई बिर्सिन्छ , वर्गको लागि राजनीतिक गरेका भन्ने गरेका कम्युनिष्ट पार्टीहरुको पारा पनि उस्तै छ ।त्यसकारण आफनो पेशागत हकअधिकारको लागि निरन्तर आन्दोलन गरिराख्न उनले मजदुर श्रमिकहरुलाइ आग्रह पनि गरे । उनले भने,‘ लडेर मात्रै अधिकार पाइन्छ भन्ने विश्वकै इतिहास साक्षी पनि छ , त्यसका कारण यातायात मजदुरहरुले आफनो हकअधिकारको लडाईलाई निरन्तर जारी राख्न्ुपर्छ तब मात्र सरकार र सत्तामा रहेकाहरुलाई दबाब पुग्छ । उनले श्रम आयोग बनाउनका लागि सरकारलाई दबाब दिन सामाजिक सन्जाल मार्फत देशव्यापी अभियान नै सन्चालन गर्न यातायात मजदुरलाई अपिल पनि गरे ।यातायात मजदुरका समस्या सम्बोधनका लागि संसद र कांग्रेस केन्द्रिय कार्यसमितिमा आफुले पनि निरन्तर आवाज उठाउने प्रतिबद्धता पनि उनले जनाए । मजदुरको आन्दोलनले लोकतन्त्रलाई अझ बलियो बनाउने भन्दै कोइरालाले भने,‘यदि मजदुहरुको आन्दोलन भएन भने लोकतन्त्र पनि बलियो हुन सक्दैन र समाजवाद पनि आउन सक्दैन ।तर मजदुरको आन्दोलन तोडफोड र विध्वंसकारी नभइ दबाबमुलक र शान्तिपूर्ण हुनुपर्नेमा मजदुर संगठनहरुले ख्याल राख्नुुपर्ने उनको भनाई थियो ।

कांग्रेस केन्द्रिय सदस्य एंव सांसद अजय चौरसियाले सरकारले प्रत्येक प्रदेशमा एक एक वटा श्रमिक अस्पताल अस्पताल बनाउनु पर्ने सुझाव दिए । उनले यातायात मजदुरहरुको समस्या भयावाह रहेकाले त्यसको सम्बोधनका लागि ध्यान दिन सरकारसंग आग्रह पनि गरे । नेपाल यातायात मजदुर संघका केन्द्रिय अध्यक्ष धर्मराज भण्डारीको अध्यक्षतामा भएको उद्घाटन समारोहलाई प्रदेशसभा सदस्यद्वय जर्नादन सिंह क्षेत्री र श्याम पटेल , प्रदेश सरकारका पूर्वमन्त्री ओमप्रकाश शर्मा , भारतको अल इन्डिया रेल्वे फेडरेसनका महासचिव शीवगोपाल मिश्र , केन्द्रिय सदस्य सबिना सिंह , संघका अजय राई , नेपाल ट्यांकर चालक संघका अध्यक्ष इश्वर लामा, कांग्रेस नेताहरु शोभाखर बुढाथोकी ,मणिन्द्रलाल नेपाली लगायतले पनि सम्बोधन गरेका थिए । महाधिवेशनमा देशभरका २ सय भन्दा बढि यातायात मजदुरहरुको सहभागीता छ ।