वीरगंज । जनता समाजवादी पार्टी नेपालको वर्गीय संगठन समाजवाद युवा संघ रौतहटको नव निर्वाचित जिल्ला कार्य समिति पदाधिकारी सदस्यहरुको शपथ ग्रहण कार्यक्रम सम्पन्न भएको छ ।शनिबार गौरमा आयोजित एक समारोहबीच संघका नवनिर्वाचित पदाधिकारीहरुको शपथ ग्रहण गराइएको छ । जिल्ला अध्यक्ष पुन प्रताप पटेलको अध्यक्षतामा भएको शपथ ग्रहण कार्यक्रममा पूर्व भूमि व्यस्था ,कृषि तथा सहकारी राज्यमंत्री योगेन्द्र यादवले संघीयता ,पहिचान समृद्धिको लागि जनता समाजवादी पार्टी नेपालको विकल्प नरहेको धारणा राखे । युवा संघ नेपालका केंद्रीय सदस्य समेत रहेका यादवले मधेश आन्दोलनको उपलब्धि नै संघीयता रहेको जिकिर गरे ।

मधेशका मसिहाको रुपमा रहेका पार्टी अध्यक्ष उपेन्द्र यादवको कारण नेपालमा संघीयता आएको उल्लेख गर्दै यादवले समाजमा कायम रहेको विभेदको अन्त्य गरी समतामूलक समाज निर्माण गर्ने जसपाको लक्ष्य रहेको बताए । जनमतपार्टीका अध्यक्ष डाक्टर सीके राउतप्रति टिपण्णी गर्दै पूर्व राज्यमंत्री यादवले सीके राउत फिल्मी नायक/नायिका जस्तो स्वरुप बदलने गरेको टिप्पणी गरे । उनले भने,‘महंगो लुगा लगाएर किसान समक्ष पुग्दैमा गरिबको नेता हूँ भन्न सकिदैन।’ गरीब, दलित, मुस्लिम, महिला, आदिवासी, जनजाति, उत्पीड़नमा परेका वर्ग समुदायको लागि असली नायक उपेन्द्र यादव नै रहेकोले मुलुकलाई उपेन्द्र यादवको आवश्यकता रहेको उनले दाबी गरे ।

बैशाख १० गते हुन गइरहेको उपनिर्वाचनमा बारा २ बाट साझा उमेदवारको रुपमा रहेका पार्टी अध्यक्ष यादव नै निर्वाचित हुने ठोकुवा समेत उनले गरे । मधेशी जनताको लागि आन्दोलन भइरहेको बेला खाड़ी मुलुकमा बसेर पैसा कमाइरहेका राउतको कुनै राजनीतिक पृष्ठभूमि नरहेको उल्लेख गरे । डलर कमाउने व्यक्ति डाक्टर राउतले उठाएका विभिन्न मुद्दाहरु बिर्सिसकेका छन्।’ कार्यक्रममा पूर्व राष्ट्रियसभा सदस्य रामप्रित पासवानले नेकपा एमाले र जनमत पार्टीले मधेश आन्दोलनबाट प्राप्त भएका उपलब्धिलाई समाप्त पार्ने षडयन्त्र गरिरहेकोले मधेशी जनता सचेत हुनुपर्ने आवश्यकता औंल्याए । कार्यक्रममा जनता समाजवादी पार्टी नेपालका संघीय परिषद् सदस्य सुधीर यादव , प्रदेश सदस्य एवं पूर्व नगर प्रमुख बीरेन्द्र यादव , जसपा रौतहटका अध्यक्ष श्याम बिहारी यादव,शिक्षक फोरमका जिल्ला अध्यक्ष कामेश्वर प्रसाद यादव लगायतका वक्ताहरुले आ– आफ्नो शुभकामना मन्तव्य व्यक्त गरेका थिए ।