वीरगंज । शोभासहितको कलश यात्रा निकालेर बाराको जीतपुरस्थित बंगाली बाबा आश्रममा बुधावारदेखि चार दिने २४ कुण्डीय गायत्री महायज्ञ सुरू भएको छ ।जिल्लाको जीतपुरसिमरा उपमहानगरपालिका वडा नम्बर ७ जीतपुरको केराढोकास्थित बंगाली बाबा आश्रममा गायत्री तिर्थ शान्तिकुन्ज हरिद्वारको तत्वावधानमा २४ कुण्डीय वेदमाता गायत्री महायज्ञको आयोजना गरिएको हो ।

महायज्ञको पहिलो दिन हजारौंले सहभागिता जनाएको शोभासहितको याकलश यात्राले यज्ञ स्थलदेखि सुरु भएर नगर परिक्रमा गरेको थियो । यात्रा नगर परिक्रमा गर्दै दुधौरो खोलाबाट जल भरेर पुनः यज्ञ स्थलमा फर्किएर महायज्ञमा परिणत भएको जीतपुर हिन्दू समाज गायत्री महायज्ञ समितिका अध्यक्ष शिवजी साह सोनारले जानकरी दिए । यज्ञको शुभारम्भ मधेश प्रदेश बारा क्षेत्र नम्बर ४ (क) बाट निर्वाचित प्रदेशसभा सदस्य देवनारायण चौधरीले दिन दिप प्रज्वलित गरि गरे ।

उनिसँगै जीतपुरसिमरा उपमहानगरपालिकाका मेयर राजन पौडेल, वडा नम्बर ७ का वडा अध्यक्ष सुनिल गुप्ता, भद्रभलादमी, समाजसेवी, सञ्चारकर्मी, सुरक्षाकर्मीलगायत श्रद्धालु तथा विभिन्न राजनितिक दलका नेता कार्यकर्ताको सहभागिता रहेको थियो । बिहिवारदेखि सुरु भएको यज्ञ चैत्र २५ गते शनिवारसम्म दैनिक बिहान ७ देखि ११ बजेसम्म चल्ने बताइएको छ । यज्ञमा गायत्री हवन गरिने र प्रत्येक दिन बेलुकी ५ बजेको संध्या आरती पश्चात राती ९ बजेसम्म हरिद्वारका आचार्यको मुखारविन्दबाट संगीतमय प्रवचन गरिने आयोजकका अध्यक्ष सोनारले बताए । २४ कुण्डीय वेदमाता गायत्री महायज्ञको हवनका लागि २४ जना दाम्पत्तिले यज्ञको पूर्णता दिलाउँन बेदीमा बसेको आयोजकले जनाएको छ ।