पर्सा । पर्साको पर्सागढि नगरपालिकाले गर्भवति महिलाका लागि निशुल्क ग्रामिण अल्ट्रासाउण्ड सेवा संचालनमा ल्याएको छ । पालिकाभित्र रहेका गर्भवति महिलाका पहिलो ३ महिने अवस्था र सुत्केरी हुनु भन्दा अगाडि दुईपटक सम्म तालिमप्राप्त स्वस्थ्यकर्मीहरुबाट अल्ट्रासाउण्ड गरि गर्भवती सम्बन्धि परामर्श दिईने बताइएको छ ।

नगरप्रमुख गोकर्ण पाठकले पालिकाचित्र रहेका गर्भवती महिलाले चेकजाँचकै लागि वीरगञ्ज जानुपर्ने बाध्यता देखिएको र यो निकै खर्चिलो समेत भएकाले गरिब परिवारका उनीहरुलाई समस्या नहोस् भन्ने अभिप्रायले निशुल्क ग्रामिण अल्ट्रासाउण्ड सेवा संचालनमा ल्याईएको बताउनुभयो । पालिकाभित्र रहेका पाँचवटा स्वास्थ्य चौकीहरुबाट मासिक रुपमा गर्भवती महिलाको अल्ट्रासाउण्ड गरिने उहाँको भनाई छ ।

नगरपालिकाले हरेक महिनाको २० गते बागेश्वरी प्राथमिक स्वास्थ्य केन्द्र, २१ गते पचँरुखी स्वास्थ्य चौकी, २२ गते बागबाना स्वास्थ्य चौकी, २३ गते हरपुर स्वास्थ्य चौकी र २४ गते बिरुवागुठि स्वास्थ्य चौकीबाट गर्भवती महिलाको अल्ट्रासाउण्ड गरिने पर्सागढिका स्वास्थ्य शाखा प्रमुख नारायण पौडेलले जानकारी दिनुभयो ।