रौतहट । रौतहटको मध्यभाग गरुडामा शनिवार आन्दोलनकारी र प्रहरीबीच झड्प भएको छ । गरुडा नगरपालिका कार्यालयसंग विभिन्न १२ बुंदे माग राख्दै विगत एकसातादेखि गरुडामा अनसनरत रहेका लोकतान्त्रिक समाजवादी पार्टीका गरुडा नगरपालिकाका मेयर प्रत्यासी दीपक यादवका समर्थक र प्रहरीबीच झड्प भएको छ । झड्पमा आन्दोलनकारीको ढुङ्गा लागेर एक जना प्रहरी घाइते भएका छन् । प्रहरीमाथि ढुङ्गामुढा गर्ने पाँच जना आन्दोलनकारी पक्राउ परेका छन् ।

झड्पमा प्रहरीले केही सेल अश्रुग्याँस समेत प्रहार गरेको छ । अनसनमा बसेका यादवका समर्थकहरुले शनिवार गरुडा स्थित गौर चन्द्रनिगाहपुर सडकखण्ड नै अवरुद्ध गरी नारावाजी गर्न थालेपछि प्रहरीले बाटो अबरुद्ध नगर्न भनी आन्दोलनकारीहरुलाई सम्झाउन गएका थिए तर बाटो खुलाउन गएका प्रहरीमाथि नै अनसनरत यादवका समथर्कहरुले ढुङ्गामुढा गर्नथालेपछि केहीबेर दुबैपक्षबीच झड्प भएको थियो । आन्दोलनकारीहरुले प्रहरीमाथि ढुङ्गामुढा गर्नथालेपछि निकै आक्रोसित बनेका प्रहरीले केही आन्दोलनकारीमाथि लाठी जार्च समेत गरेको थियो ।

आन्दोलनकारीले गरेको ढुङ्गामुढाका कारण इलाका प्रहरी कार्यालय गरुडाका नाम खुल्न नसकेका एकजना बरिष्ठ प्रहरी हबल्दार घाइते भएका इलाका प्रहरी कार्यालय गरुडाले जनाएको छ । घाइते प्रहरी हवल्दारको गरुडाकै एक अस्पतालमा उपचार भइरहेको प्रहरीले जनाएको छ । स्थितिलाई नियन्त्रणमा लिन ५ सेल अश्रुग्याँस प्रहार गर्नुपरेको इलाका प्रहरी कार्यालय गरुडाका प्रहरी नायव उपरीक्षक (डिएसपी) छेदीलाल कामतीले जानकारी दिए ।