वीरगंज । नेकपा एमालेको पार्टी संगठन सुदृढीकरणका लागि मिसन ग्रासरुट अभियान चलिरहेका बेला तेह्रथुममा भने यहाँका नेता कार्यकर्ता फरक भूमिकामा देखिएका छन् । तेह्रथुममा मिसन ग्रासरुटको नेतृत्व गरेर गएका एमाले केन्द्रीय सदस्य तथा संविधानभा सदस्य यज्ञराज सुनुवार आफैं घन र कोदालो बोकेर श्रम शिविरमा निस्किएपछि यहाँका अन्य नेता कार्यकर्ता पनि श्रममा जुटेका छन् । शनिबार स्थायी कमिटी सदस्य तथा कोशी प्रदेशका पूर्वमुख्यमन्त्री शेरधन राईसमेत श्रम शिविरमा सहभागी भएका छन् ।

छथर गाउँपालिकाको सिदुवाबाट वडा नम्बर १ को वडा कार्यालय हुँदै शुक्रबारे जोड्ने सडकको अवरोध हटाएर एमालेको मिसन ग्रासरुटले सहज यातायात सञ्चालनको अवस्था बनाएको छ । वर्षात र अन्य कारण राम्रोसँग सञ्चालन हुन नसकेको सडकमा एमालेले श्रम शिविरमार्फत अवरोधहरू पन्छाएर यो सातादेखि बस सन्चालन गर्न मिल्नेगरी काम सम्पन्न भएको मिसन ग्रासरुटका लागि तेह्रथुम खटिएका नेता सुनुवारले बताए ।

श्रम शिविरमा पूर्वसांसदहरु लक्ष्मण तिवारी, तेजमान कन्दङ्वा, छथर गाउँपालिकाका अध्यक्ष सन्तोष तिगेलालगायतका नेता कार्यकर्ता सहभागी छन् । छथर गाउँपालिकाका ६ वटै वडामा मिसन ग्रासरुटको राजनीतिक काममात्र नभएर श्रम शिविर सन्चालन गरिएको सुनुवारले बताए ।bगाउँपालिका कमिटीको आयोजना र वडा कमिटीहरूको व्यवस्थापनमा सबै वडामा श्रम शिविर सन्चालन भएको र ९ किलोमिटर सडकको नाली सरसफाइ तथा मर्मत गरिएको एमालेले जनाएको छ । अस्पतालहरूको सरसफाइमा समेत एमालेका ६४७ जना नेता कार्यकर्ता सहभागी भएको गाउँपालिका कमिटीले जनाएको छ ।