वीरगंज । घरेलु टोली भारतलाई ९ विकेटले हराउँदै अष्ट्रेलियाले शुक्रबार आईसीसी विश्व टेष्ट च्याम्पियनसिपको फाइनलमा स्थान पक्का गरेको छ । अष्ट्रेलियाविरुद्ध फाइनलमा कसले प्रतिस्पर्धा गर्छ अझै टुंगो लागेको छैन । प्याट कमिन्सको कप्तानीमा रहेको अष्ट्रेलियाले विश्व टेष्ट च्याम्पियनसिपको २०२१–२३ मा १८ मध्ये ११ टेष्ट खेल जितेको छ । चार खेल बराबरी खेलेको छ । तीन खेलमात्र हारेको छ । अष्ट्रेलियाले पछिल्लो पटक भारतमाथि ९ विकेटको विजय हासिल गरेको हो । इन्दोरस्थित होल्कर क्रिकेट मैदानमा पाहुना टोली अष्ट्रेलियाका स्पिनर नाथन लियोनले उत्कृष्ट प्रदर्शन गरेपछि भारतका कुनै पनि ब्याट्सम्यानले खुलेर ब्याटिङ गर्न सकेनन् ।

अष्ट्रेलियाले तेस्रो दिन ७५ रनको लक्ष्य पछ्याएको थियो । जुन लक्ष्य शुक्रबार बिहान १८.५ ओभर खेल्दा एक विकेट गुमाएर पूरा गरेको हो । ओपनर उस्मान ख्वाजा शून्यमा आउट हुँदा ट्रभिस हेड ४९ र मार्नुस लाबुसेन २८ रनमा अविजित रहे । ख्याजा रविचन्द्रन आश्विनको बलमा आउट भएका हुन् । दोस्रो इनिङ्समा लियोनले आठ विकेट लिएपछि भारतले १६३ रन बनाउँदा सबै विकेट गुमाएको थियो । भारतका लागि चेतेश्वर पुजराले ५९, श्रेयस ऐयरले २६, आश्विनले १६, बिराट कोहलीले १३ र कप्तान रोहित शर्माले १२ रन बनाए । अक्सर पटेलले अविजित १५ रन बनाए । अन्यले दोहोरो अंकमा रन बनाउन सकेनन् । लियोनलाई मिचेल स्टार्क र म्याथ्यु कुहनेमनले एक/एक विकेट लिएर साथ दिएका थिए ।

टस जितेर ब्याटिङ गरेको भारतले पहिलो इनिङ्समा पनि १०९ रन बनाउँदा सबै विकेट गुमाएको थियो । भारतका लागि कोहलीले २२, शुभमन गिलले २१, श्रीकर भारतले १७, रोहितले १२ रन बनाए । अक्सर पटेल १२ रनमा अविजित रहे । अष्ट्रेलियाका कुहनेमनले पाँच विकेट लिएका थिए भने लियोनले तीन र टोड मुर्फेले एक विकेट लिएका थिए । अष्ट्रेलियाले पहिलो इनिङ्समा ८८ रनको अग्रता लिएको थियो । पाहुना टिमले सबै विकेट गुमाएर १९७ रन बनाएको थियो । अष्ट्रेलियाका ख्वाजाले ६० रन बनाउँदा लाबुसेनले ३१, स्टिभ स्मिथले २६, क्यामरुन ग्रिनले २१ र पिटर ह्याड्सकोम्बले १९ रन बनाए । भारतका रविन्द्र जडेजाले चार विकेट लिँदा उमेश यादव र रविचन्द्रन आश्विनले तीन÷तीन विकेट लिए ।