प्राडा राजेन्द्र कोजु मुटु रोग विशेषज्ञ हुन्। उनी काठमाडौं विश्वविद्यालय, स्कुल अफ मेडिकल साइन्स धुलिखेलका डिन समेत हुन्। डा कोजु कला, साहित्य र सङ्गीतमा निकै रुचि राख्छन्। स्वास्थ्य खबरको लागि अन्शु खनालले उनीसँग गरेको कुराकानी :

तपाईँलाई कहिले देखि चित्र बनाउने रुचि लाग्यो?
म स्कुलको दिनदेखि नै अलिअलि चित्र कोर्थे। तर बिचमा आफ्नो व्यस्तताले गर्दा केही गर्न पाएको थिइन्। पछिल्लो समय कोरोना कालमा फुर्सदमा फेरी चित्र कोर्न थालेँ।

कस्तो प्रकारको चित्रहरू बनाउन मन पर्छ?
धेरै जस्तो मलाई प्रकृतिको, सेनारियोहरुको बनाउँछु। आफूले आँखाले देख्दा जे राम्रो लाग्छ त्यो बनाउने कोसिस गर्छु। त्यसमा कहिले कसो हाम्रा वरपरका चिजहरू (घर, बस्ती) हरू पनि बनाउन मन लाग्छ।

चित्रहरू कागजमा बनाउन बढी मन पर्छ की डिजिटल?
मलाई दुवै कामहरू उत्तिकै मन पर्छ। मेरो सामाजिक सञ्जालमा भएका कामहरू मैले ल्यापटपबाट बनाएको हुँ। डिजिटल काम गर्दा पूर्णता नभए जस्तो लाग्छ तर कहिले कसो बनाउन मन पर्छ।

तपाईँलाई मन पर्ने चित्रकार?
धेरै हुनुहुन्छ, म समग्र चित्र बनाउने सबैलाई उत्तिकै मन पराउँछु। तर म लैनसिंह बाङ्देल र सुमन चित्रकारको चित्रहरूको प्रशंसक हुँ।

तपाई गीत पनि गाउनु हुन्छ, कहिले देखि सङ्गीतमा रुचि लाग्यो?

गीत पनि स्कुल पढ्दा देखि नै हो। आफूलाई रमाइलो लाग्ने हुनाले सानै देखि गुनगुनाउने गर्थे।

कस्तो गीतहरू मन पर्छ?
त्यो जमानाको आधुनिक गीतहरू।

किताब कत्तिको पढ्नुहुन्छ नि?
बजारमा नयाँ आएका किताबहरू सकेसम्म नछुटाउँ भन्ने हुन्छ। समय मिल्ने बित्तिकै किताब पढी हाल्छु।

कुन विधाको किताबमा हजुरको रुचि छ?
म सबै खाले किताब पढ्छु। आख्यान, गैरआख्यान सबै पढ्छु।

अहिले कुन किताब पढ्दै हुनुहुन्छ?
अहिले म सद्गुरुको कर्म र बुद्दीसागरको एक्लो भन्ने किताब पढीरहेको छु। डा भगवान् कोइरालाको हृदय पनि सँगै छ।

यी सबै कुराहरू कुन समयमा गर्नुहुन्छ?

यी सबै फुर्सदको समयमा गर्छु। फुर्सदको समय आफ्नो लागि दिऊँ भन्ने हुन्छ। त्यसकारण त्यो समयमा केही कोर्ने, गुनगुनाउने या पढ्ने गर्छु।

चिकित्सक भएर पनि कला, सङ्गीत र साहित्यमा रुचि राख्नु हुन्छ, यसले तपाईँलाई कस्तो महसुस हुन्छ? किन गर्नुहुन्छ?
एकदमै आनन्दको महसुस हुन्छ मलाई। यी सबै चिज गर्दा आफ्नो आत्मालाई सुने जस्तो लाग्छ। रमाइलो लाग्छ त्यस कारणले नै गर्छु।