वीरगन्ज । सरकारी कामकाजबाहेक अन्य काममा प्रयोग गर्न नपाइने सरकारी गाडीको पर्सामा दुरुपयोग बढ्दै गएको छ । जनप्रतिनिधि र सरकारी कर्मचारीले आफू अनुकूल सरकारी गाडीको प्रयोग गर्न थालेका हुन् । विभिन्न मेला महोत्सव, घुमघाम र निजी काममा समेत सरकारी गाडी प्रयोग भइरहेका छन् । तर कुनै पनि निकायले गाडी दुरुपयोग भएको नियमन गरेको छैन ।

शुक्रबार पर्साको जिराभवानी गाउँपालिका स्थित रहेको जिराभवानी माईको मन्दिरमा लागेको मेलामा रमाइलो गर्न र घुमघाम गर्ने गएका वडा अध्यक्ष पुनिलाल साह तेलिको सरकारी मोटरसाइकल चोरी भएको छ ।

पर्साको बहुदरमाई नगरपालिका अन्तर्गत पञ्जिकरण शाखामा कार्यरत प्रबिन्द कुमार साहले पालिकाको कामकाजका लागि लिएको प्र २-०३-००१ ब ५८ नम्बर सुपर स्पेलेण्डर मोटरसाइकल चोरी भएको हो ।

पञ्जिकरण शाखामा कार्यरत साहले आफु कार्यालय आउन जनाको लागि लिएको मोटरसाइल उनका बुबा वडा अध्यक्ष पुनीलाल साह तेलिले प्रयोग गर्दै आएका थिए ।

नेपाल सरकारले दोहरो सेवा सुविधा रोक लगाए सँगै स्थानीय तहका जनप्रतिनिधिहरुले कुनै एक सुविधा लिने गरेकोमा वडा अध्यक्ष तेलीले आफू प्रयोग गर्दै आएको गाडी कार्यलयमा बुझाई सेवा सुविधा लिई रहेका थिए भने पञ्जिकरण शाखामा कार्यरत उनका छोरा प्रबिन्द कुमार साहको नाममा नगरपालिकाको कार्यलयबाट सरकारी गाडी लिई वडा अध्यक्ष तेलीले प्रयोग गर्दै आएका थिए ।

शुक्रबार वडा अध्यक्ष तेलीले आफैं मोटरसाइकल लिई मेलामा घुम्न गएका थिए । मेलामा पार्किङ गरी मेला घुम्दै गरेकोमा सरकारी मोटरसाइकल चोरी भएको स्थानियहरुले बताएका छन् ।

तर यस विषयमा बहुदरमाई नगरपालिकाको फेसबुक पेजमा यस्तो सूचना सार्वजनिक गरिएको छ ।

सुचना ! सुचना !! मोटरसाईकल हराएको सुचना !!!

आज यहि मिती २०७९ फागुन १२ गते शुक्रबारका दिन ३ः३० बजे तिर यस बहुदरमाई नगरपालिका अन्तर्गत पञ्जिकरण शाखा मा कार्यरत प्रबिन्द कुमार साहले चलाईरहेको मोटरसाईकल सुपर स्पेलेण्डर सवारी नं. प्र २-०३-००१ ब ५८ रहेको मोटरसाइकल जिराभवानी गाउपालिकाको कार्यालयमा गई पञ्जिकरण शाखाको एम.आई.एस अपरेटर संग भी पी एन सम्बन्धी बिषयमा समन्वय गरी फर्किएको बेला जिराभवानी गा.पा नजिक रहेको मन्दिर दर्शन गर्ने शिलसिलामा निजको मोटरसाइकल चोरी भएको ब्यहोरा अनुरोध छ।
साथै हराएको मोटरसाईकल यदि कसैले हेर्न साथ बहुदरमाई नगरपालिकाको कार्यालय वा नजिकको प्रहरी चौकी वा जिला प्रशासन कार्यालयमा जानकारी गरिदिनहुन् समेत अनुरोध छ ।

यस बिषयमा वडा अध्यक्ष तेलीसँग बुझ्दा म र मेरो छोरा पालिकाको कामले होइन मन्दिरमा पूजा गर्न गएको उनले बताए । मन्दिर पुगेको ३० मिनेटमै गाडी चोरी भएको उनले बताए । तर स्रोतका अनुसार वडा अध्यक्ष तेली एकलै मेला घुम्न गएका थिए । नगरपालिकाले आफ्नो गल्ति ढाकछोप गर्न यस्तो विज्ञप्ति जारी गरेको स्थानीयहरुले आरोप लगाएका छन् वडा अध्यक्ष तेलीले पञ्जिकरण शाखामा कार्यरत साहको नाममा नगरपालिकाबाट गाडी बुझ्न लगाई आफै प्रयोग गर्दै आएको प्रत्यक्षदर्शीले बताएका छन् ।