रौतहट । कुमार चन्दन । रौतहटको गरुडा नगरपालिकामा प्रमुख प्रशासकीय अधिकृतको रुपमा भूदेव झा हाजिर भएका छन् । लामो समयदेखि निमित्त प्रमुख प्रशासकीय अधिकृतको भरमा चलिरहेको गरुडा नगरपालिकाको कार्यालय प्रमुखमा उपसचिव झा विहीवार दिउँसो हाजिर भएका हुन् ।

नगर प्रमुख कन्थमनि प्रसाद कलवार तथा उपप्रमुख पुनमकुमारी चौधरीसहित वडाध्यक्षहरु र कार्यालयका कर्मचारीहरुको उपस्थितिमा झाले कार्यालय प्रमुखको रुपमा हाजिर भएका हुन् । कार्यालय प्रमुखको रुपमा नगर प्रमुख कलवारले झालाई स्वागत पनि गरेका छन् । यसअघि ईशनाथ नगरपालिकाको कार्यालय प्रमुख रहेका झाले अब दुई नगरपालिकाको जिम्मेवारी एक साथ सम्हाल्ने छन् ।

कार्यालयमा हाजिर भएपछि झाले सर्वसाधारणले पाउने सेवा र सुविधालाई पारदर्शी किसिमले सहजताका साथ प्रदान गरिने बताएका छन् । नियमानुसार महसुस हुने गरी सर्वसाधारण नागरिकलाई सेवा दिन कार्यालय प्रमुख झाले कर्मचारीहरुलाई निर्देशन पनि दिएका छन् ।