धनगढी । सुदूरपश्चिम प्रदेश सभाको बैठक लगातार चौथौंपटक सरेको छ । मुख्यमन्त्री राजेन्द्रसिंह रावलले विश्वासको मत लिन आज १ बजे आह्वान गरिएको बैठक पुनः सारिन लागिएको हो । नागरिक उन्मुक्ति पार्टीकै समर्थनमा मुख्यमन्त्री बनेका उनलाई आफूहरूको माग मुद्दा सम्बोधन नभएसम्म विश्वासको मत नदिने अडानमा बसेपछि बैठक सारिँदै आइएको छ । मुख्यमन्त्री रावलले विश्वासको मत लिन सुरुमा बुधवार ११ बजे बैठक आह्वान गरिएको थियो ।

विश्वासको मत लिन वातावरण नबनेपछि २ घण्टा पछाडि १ बजे बस्ने गरी सारियो । त्यसपछि बस्न नसकेपछि आज १ बजेको लागि बैठक आह्वान गरियो । आज १ बजेको समयमा पनि बैठक बस्न नसकेपछि साँझ ४ बजेसम्मको लागि सारिएको प्रदेश सभा सचिवालयका सचिव देवबहादुर बोगटीले जनाए । नागरिक उन्मुक्तिका प्रदेशसभा सदस्य हाल काठमाडौँमै रहेका छन् । उनीहरुले आफूहरूले उठाउँदै आएको रेसम चौधरीसहित टीकापुर राजबन्दी रिहाइ नभएसम्म विश्वासको मत नदिने बताएका छन् ।

पटक–पटक बैठक सार्न थालेपछि प्रमुख प्रतिपक्षी दल नेपाली कांग्रेस र एकीकृत समाजवादीले विरोध समेत जनाउँदै आएका छन् । नागरिक उन्मुक्ति पार्टीका प्रमुख सचेतक लक्ष्मण किशोर चौधरीले भने, ‘विश्वासको मत दिने वातावरण अझै बनेको छैन । कारागारको ढोका खुलेपछि मात्रै सरकार ढोका खुला हुनेवाला छैन ।’
आज ४ बजे बैठक बस्ने नसकेको अवस्थामा मुख्यमन्त्री रावलको राजीनामा आउन सक्ने बताइएको छ ।मुख्यमन्त्रीमा नियुक्त भएको एक महिनाभित्रै विश्वासको मत लिनुपर्ने संवैधानिक व्यवस्था छ । उनी पुस २७ गते मुख्यमन्त्रीमा नियुक्त भएका थिए ।