विराटनगर । रानी-विराटनगर-इटहरी-किमाथांका व्यापारिक मार्गअन्तर्गत इटहरी वडा नम्बर ६ भित्र पर्ने घर भत्काउन सुरू भएको छ ।
त्रिदेशीय ६ लेन सडकमार्गको राइट अफ वेभित्र पर्ने घर भत्काउन अन्तिम अल्टिमेटम दिए पनि घरधनीले घर भत्काएका छैनन् ।
इटहरी बजारको मुख्य चोकभन्दा दक्षिणतर्फ सडकको क्षेत्रभित्र पर्ने घर नभत्काएपछि सडक विस्तारको काम प्रभावित भएको छ ।
सडकको क्षेत्रमा पर्ने घरधनीसँग दुवैतर्फ १५–१५ मिटर विस्तार गर्ने निर्णय भएको थियो । सहमतिअनुसार घर नभत्काउँदा सडक विस्तार हुन सकेको छैन ।
अटेर गरे ती घरहरू पनि डोजर लगाएर भत्काउने इटहरीका मेयर हेमकर्ण पौडेलले बताए । उनले घरमा रहेका व्यापारीलाई पसल अन्यत्र सार्न अनुरोध गर्दै विकासमा बाधक नबन्न आग्रह गरेका छन् ।
इटहरी उपमहानगरपालिका-९ मा सडकको क्षेत्राधिकार भित्र पर्ने १४ वटा घर डोजर प्रयोग गरी भत्काइसकिएको छ ।
सोही लाइनको इटहरीकै पुरानो क्लबले पनि आफ्नो भवन भत्काएको छ । त्यस्तै स्थानीय राजकुमार भुजेलले पनि आफू सडक विस्तारको बाधक नभएको भन्दै आफ्नो घर आफैले भत्काएका छन् । तर, केही घरधनीहरूले भने मुआब्जा नपाए सम्म घर भत्काउन नदिने भन्दै आएका छन् ।
इटहरी- ६ का केही घर भत्काउन अल्टिमेटम दिएको र अटेर गरे ती घरमा पनि डोजर लगाइने मेयर पौडेलले बताए ।
इटहरीको मुख्य चोकदेखि उत्तर तरहरातर्फ ६ लेन सडकको काम सकिए पनि दक्षिणी क्षेत्र विराटनगर लाइनमा भने बाँकी नै छ । ६ लेन सडक विस्तार आयोजनाका अनुसार इटहरी बजारदेखि उत्तरतर्फ सेनाको मुख्यालयसम्म २०-२० मिटर सडक विस्तार गर्न घर भत्काउनु पर्दैन ।
फुटपाथ बनाउन भने घर पनि भत्काउनुपर्छ । तर, अहिले त्यो काम अघि बढेको छैन ।
२०६९ /०७० बाट सुरू भएर सात वर्षभित्रमा ६ लेन सडक विस्तार गर्ने लक्ष्य राखिएको थियो । पछिल्लो समय थप गरिएको हो ।
