गौर । गौर नगरपालिका वडा नम्बर ५ स्थित फुलतारा डेरी उद्योगमा रौतहट प्रहरीले छापा मारेर ठूलो परिमाणमा अखाद्य बस्तुहरु बरामद गरेको छ । विशेष सूचनाको आधारमा जिल्ला प्रहरी कार्यालय र जिल्ला प्रशासन कार्यालयको संयुक्त टोलीले गौर-६ स्थित पोखरीको पश्चिमी डिलमा रहेको फुलतारा डेरी उद्योगमा मङ्गलबार छापामारी गरेको हो ।

प्रहरीले डेरी सञ्चालक राजपुर नगरपालिका वडा नम्वर १ भगवानपुर निवासी महम्मद मतिउल्लाहसहित अन्य २ जना कामदार र एकजना महिलालाई नियन्त्रणमा लिएको छ । डेरी उद्योग रहेको घर पनि मतिउल्लाहकै हो ।

मतिउल्लाहले उद्योगमा भारतबाट अखाद्य बस्तुहरु आयात गर्न गरेको पाइएको जिल्ला प्रहरी कार्यालय रौतहटले जनाएको छ । आयात गरिएको अखाद्य बस्तुको प्रयोगबाट घिउ तयार पार्न गरिएको प्रहरीले जनाएको छ । उद्योगमा उत्पाधित घिउ गौर र सङ्घीय राजधानी काठमाडौँसहति देशका अन्य भेगमा समेत जानेगरेको थियो ।

रौतहट प्रहरी प्रमुख एवम् प्रहरी उपरीक्षक (एसपी) विरबहादुर बुढा मगरका अनुसार विशेष सूचनाको आधारमा उद्योगमा छापामारी गरिएको थियो । उनले बरामद सामग्रीको जाँच गर्न बारे खाद्य प्राविधिक तथा गुण नियन्त्रण कार्यालय सर्लाहीलाई खवर गरिएको र सम्भवत: आज बुधबार त्यहाँबाट विज्ञहरुको टोलीले आएर परिक्षण गर्ने जानकरी दिए ।