वीरगञ्ज । वीरगञ्ज महानगरपालिकाले सडकमा जथाभावी फोहोर फाल्नेलाई कडा कारबाही गर्न थालेको छ । सडकका ठाउँठाउँमा खटिएका नगरप्रहरी र सफाईकर्मीले जथाभावी फोहोर फाल्नेलाई तत्कालै जरिबाना तिराउने गरेका छन् । सडकमा जथाभावी फोहोर फाल्नेमा यहाँका वित्तीय संस्था अघि देखिएका छन् । आइतबार मात्रै एनआइसी एसिया ब्याङ्कलाई पाँच हजार रुपैयाँ जरिवाना तिराइएको छ । आदर्शनगर क्षेत्रमा रहेको ब्याङ्कले सडकमा असरल्ल पारेर फोहोर फालेका कारण जरिवाना गराइएको महानगरका सरसफाई तथा वृक्षारोपण संयोजक जयप्रकाश खेतानले बताए ।
यस्तै वीरगञ्जको लिङ्करोडस्थित माछापुच्छ्रे ब्याङ्क र आदर्शनगर क्षेत्रमै रहेको कलवार कल्याण सेवा सदनलाई पनि १र१ हजार रुपैयाँ जरिबाना गरिएको पनि संयोजक खेतानले जानकारी दिए । फोहोरको प्रकृती र मात्राको आधारमा जरिबाना गर्ने गरिएको पनि उनले बताए ।पहिलो चरणमा सचेत अभियान चलाइएको भएपनि अटेर गरेर सडकमै फोहोर फाल्न नछाडेपछि अब जरिबाना गर्न लागिएको महानगरका सरसफाई प्रमुख सरफुद्धिन मियाँ बताउँछन् ।
‘सडकमा जथाभावी फोहोर नफालौँ भनेर माइकिंग गर्नुका साथै सञ्चारमाध्यमबाट प्रचार प्रसार पनि गरियो, स्थलगत रुपमै पनि सचेतना अभियान चलाईयो,’ उनले भने, ‘तर पनि अटेर गरेपछि बाध्य भएर जरिबाना तिराउन थालेका हौँ ।’ महानगरपालिकाका नगरप्रमुख राजेशमान सिंह निर्वाचित भएर आएसँगै नगर हरियाली र सरसफाईलाई प्राथमिकता दिँदै अभियान चलाइरहेका छन् । अहिले नगर हरियाली र सफा बनाई राख्न सडक, नाला तथा फुटपाथमा राखिएका निर्माण सामग्री तथा भौतिक संरचना हटाउने र फोहोर व्यवस्थापन गर्ने कामका साथसाथै वृक्षारोपण गर्ने काम चलिरहेको छ ।
