वीरगंज । रोल्पामा ट्याक्टर दुर्घटना हुँदा चालकको मृत्यु भएको छ । शनिबार साँझ ६ बजेतिर पश्चिम रोल्पाको गंगादेव गाउँपालिका–४ सिस्नेमा ट्याक्टर दुर्घटना भएको प्रहरीले जनाएको छ । प्रहरीका अनुसार गंगादेव–७ राँकबाट तेल लिन खाली ड्रम बोकेर सल्यान जाने क्रममा रा १ त ४१६१ नम्बरको ट्याक्टर गंगादेव–४ मा दुर्घटनाग्रस्त भएको थियो ।

ट्याक्टर भित्री सडकबाट करिब २ सय मिटर तल खसेको थियो। ट्याक्टरमा तीन जना रहेकोमा चालक रोल्पा गंगादेव–७ तिम्ले निवासी २२ वर्षीय अम्मर वलीको घटनास्थलमै मृत्यु भएको हो ।दुर्घटनामा दुई जना घाइते भएका छन् । गंगादेव–७ का १७ वर्षीय राजेश केसी र गंगादेव–४ मालेखोलाका २२ वर्षीय वीरबहादुर केसी घाइते भएका हुन् । उनीहरू दुवैलाई उपचारका लागि शनिरबार राति नै दाङस्थित अस्पतालमा पुर्‍याइएको थियो ।

घाइते दुवैको अवस्था सामान्य रहेको स्वास्थ्यकर्मीहरूले बताएका छन् । रोल्पाका प्रहरी प्रमुख प्रहरी नायब उपरीक्षक विनोद घिमिरेका अनुसार घटना लगत्तै उद्धारका लागि रोल्पाको पाखापानीस्थित प्रहरी चौकीबाट प्रहरी सहायक निरीक्षक योगेन्द्र पुनको नेतृत्वमा २ जना र घर्तीगाउँ इलाका प्रहरी चौकीबाट प्रहरी निरीक्षक देवराज भट्टराईको नेतृत्वमा ५ जना प्रहरी घटनास्थलमा पुगेका थिए ।