बारा । बारा जिल्लाको सदरमुकाम कलैया उपमहानगरपालिकाले चिसो विदालाई लम्ब्याएको छ । पछिल्लो समय तराई मधेशमा शितलहरका कारण बढ्दै गएको चिसोले गर्दा कलैया उपमहानगरले त्यहाँ रहेका विद्यालयहरुमा दिएको विदालाई लम्ब्याएको हो । बुधबार एउटा सूचना जारी गर्दै उपमहानगरले तराईका जिल्लाहरुमा हुस्सु एवम् शितलहरका कारण अत्यधिक चिसो बढ्दा पठनपाठनमा असहज हुने हुँदा छात्रछात्राहरुको स्वास्थ्यलाई मध्यनजर गर्दै भोलि विहिबारदेखि खुल्ने भनिएको सामूदायिक,
संस्थागत तथा धार्मिक विद्यालय आइतबारदेखि मात्र खुल्ने जनाएको छ । ‘विगत केहि दिनदेखि तराईका जिल्लाहरुमा बढेको बाक्लो हुस्सु एवम् शितलहरको कारणले गर्दा पठनपाठन गर्न असहज एवम् बालबालिकाको स्वास्थ्यमा प्रतिकूल असर पर्ने भएकोले यस पालिकाअन्तर्गतका सम्पूर्ण सामूदायिक तथा संस्थागत विद्यालयहरु मिति २०७९ पुष २९ गते शुक्रबारसम्म आदेशानुसार विदा थप गरिएको हुँदा सम्बन्धित सबैको जानकारीको लागि यो सूचना प्रकाहित गरिएको,’
उपमहागरका शिक्षा अधिकृत विजयी अधिकारीद्वारा जारी गरेको सूचनामा उल्लेख छ । उपमहानगरले यसअघि पुष २३ गते सूचना जारी गरेर पुष २६ गतेसम्मका लागि विद्यालयहरुमा चलिरहेको विदालाई लम्ब्याएको थियो । त्यसअघि पुष १८ गते सूचना जारी गर्दै पुष १९ गतेदेखि २२ गतेसम्मका लागि विद्यालय बन्द गरेको थियो ।