वीरगंज । जिल्ला प्रहरी कार्यालय पर्साले आफ्नै साथीहरुबाट अपहरणमा परेको एक जना बालकलाई उद्दार गरेको छ । चार जनाको समूह रहेका उनीहरुले कक्षामा सधै प्रथम भएको भन्दै आफ्नै साथीलाई अपहरण गरी बन्दक बनाएको थियो । बीरगन्ज महानगरपालिकाको वडा नं. १६ इनर्वामा वस्ने १६ बर्षिक बालकलाई आफ्नै घरको आँगनमा रहेको चापाकलमा हातमुख धोईरहेको अवस्थामा निज सँगै अध्ययन गर्ने समेत चार जना मिलेर कम्बलले छोपी ओढाई नियन्त्रणमा लिएको थियो ।

नियन्त्रणमा लिए पश्चात बालकको मुखमा कपडा कोची बोल्न कराउन नदिइ घर छेउको कल धाराबाट अन्दाजी ३ सयको मिटरको टाढा सुनसान खाली चौरमा लगी मुखमा थप गलबन्दी, पन्जा तथा रूमाल कोचेर केबलको कालो तारले मुखको कपडा नखुस्कियोस भनेर वाँधी खुट्टा र दुवै हात पछाडी फर्काएर बाँधेर राखेको थियो । बालक हराएको प्रहरीलाई अभिभावकले जनकारी गराएपछि प्रहरीले खोजतलासको क्रममा फेला पारी उद्दार गरेको जिल्ला प्रहरी कार्यालय पर्साले जनाएको छ ।

जिल्ला प्रहरी कार्यालय पर्साका प्रवक्ता प्रहरी नायव उपरीक्षक दिपक गिरीका अनुसार कक्षामा सँधै प्रथम भएकोले निजको निकटतम प्रतिस्पर्धी विद्यार्थीले रिस, द्वेस र डाहका कारण सो छात्रलाई अपहरण गरी बन्धक बनाएका थिए । अपहरणमा समलग्न रहेको चारै जनालाई पर्सा जिल्ला अदालतबाट अपहरण तथा शरीर बन्धक कसूरमा दिन ६ दिन म्याद थप अनुमति लिई अनुसन्धान प्रक्रिया अगाडी बढाइएको डिएसपी गिरीले बताए । घटनाको गम्भीरतालाई हेरी प्रहरीले अपहरणमा परहेको बालक तथा अपहरणकारी बालकहरुको नाम गोप्य राखेको छ ।