वीरगन्ज । वडा प्रहरी कार्यालय विर्ताले बिल बिजक भन्दा बढी औषधी, लत्ताकपडा तथा खुद्रा सामाग्रीहरू लोड रहेका ट्रक नियन्त्रणमा लिएको छ ।

बिल विजक भन्दा बढी खुद्रा, लत्ता कपडा तथा औषधी लगायतका सामानहरू बोकेको ट्रक वीरगञ्जबाट कास्कीतर्फ गईरहेको क्रममा सूचना प्राप्त भई वडा प्रहरी कार्यालय विर्ताको मातहतमा खटिएको टोलीले मंगलबार राती जिल्ला पर्सा वीरगञ्ज महानगरपालिका वडा नं. ६ लोहारपट्टी चोक स्थित सडकखण्डमा ना.३ ख २७७ नम्बरको मालवाहक ट्रकलाई रोकी जाँच गर्ने क्रममा नमस्ते ट्रासपोर्टबाट पठाईएको ट्रकमा विल बिजक संकास्पद देखिएको हुँदा वडा प्रहरी कार्यालय विर्ताले नियन्त्रणमा लिएको छ ।

उक्त ट्रक नियन्त्रणमा लिई हेर्दा एकसठ्ठी लाख छयालीस हजार बाह्र बराबरको खुद्रा, लत्ताकपडा तथा औषधीजन्य सामाग्रीहरू फेला पारेको छ । थप अनुसन्धान तथा आवश्यक कारवाहीको लागि आज बुधबार राजश्व अनुसन्धान कार्यालय पथलैया, बारामा बुझाइएको छ ।