वीरगंज । कतारमा जारी विश्वकप फुटबल २०२२ को प्रि–क्वाटरफाइनल चरणको अन्तिम खेलमा आज राति पोर्चुगलको टीम जब स्विट्जरल्यान्डविरुद्ध मैदानमा उत्रिनेछ, तब आठौँ स्थान (क्वाटरफाइनल) सुरक्षित गर्ने अन्तिम अपेक्षा भनेकै स्टार फुटबलर क्रिस्टियानो रोनाल्डोको प्रदर्शन हुनेछ । जारी विश्वकपमा भाग लिइरहेका प्रख्यात खेलाडीहरुमा केलियन एम्बापे प्रतियोगिताकै टप गोल स्कोरर बनेका छन् भने दिग्गज खेलाडी लियोनेल मेस्सीले धेरै गोल नगरेता पनि आफ्नो खेलले सबैलाई प्रभावित बनाएका छन् । तर, रोनाल्डोले भने त्यस्ता कुनै कुराले अहिलेसम्म आफ्नो प्रतिभासंग न्याय गर्न सकेका छैनन् । त्यसैले अब गरेर देखाउने पालो भनेकै रोनाल्डोको हो ।

रोनाल्डोले जारी विश्वकपका शुरुवाती खेलमा गोल लगाएर पाँचौँ विश्वकपमा गोल गर्ने खेलाडी भने बनिसकेका छन् । यद्यपि, त्यसपछि भने उनी गोल लगाउन सफल भएका छैनन् । हुन पनि, रोनाल्डोको सर्वश्रेष्ठ प्रदर्शन नकआउट चरणमा देखिएन । विश्वकपमा उनले कुल आठ पटक गोल गरेका छन्, तर त्यसमध्ये कुनै पनि गोल नकआउट चरणमा भएका होइनन् । पाँच पटक फिफा वर्षको सर्वश्रेष्ठ खेलाडीको रुपमा छनौटमा परेका रोनाल्डो सम्भवतः यसपटक अन्तिम विश्वकप खेल्दैछन् । त्यसैले उनले यसपटकको खेलमा उपाधि नै चाहेका छन् ।

पोर्चुगलको टीमले समुह चरणका खेलमा जीत हासिल गरेर प्री–क्वार्टरफाइनलको टिकट काटेता पनि समुहको अन्तिम खेलमा दक्षिण कोरियासंग हारेर आफ्नो कमजोरी उजागर गरेको थियो । स्विट्जरल्याण्डको टीम १९५४ मा अन्तिम पटक क्वाटरफाइनलमा पुगेको थियो । यद्यपि, पोर्चुगलका लागि यो चुनौती सहज हुने छैन । स्विट्जरल्याण्ड त्यही टिम हो, जसले फ्रान्सलाई अन्तिम १६ खेलमा पराजित गरेको थियो । स्विट्जरल्यान्ड पछिल्लो केहि समयदेखि आफ्नो महादीपको सबैभन्दा निरन्तर प्रदर्शन गर्ने टीममध्ये एक बनेको छ । स्विट्जरल्यान्डको टीमलाई जीत हासिल गराउने जिम्मेवारी केहि हदसम्म ब्रील एम्बोलोमाथि रहेको छ । उनले ग्रुप स्टेजमा दुई गोल लगाएका छन् । पछिल्ला पाँच खेलमा उनले चार गोल लगाउन सफल भएका छन् ।

पोर्चुगलविरुद्ध स्विट्जरल्यान्ड

फिफा र्याङ्किङ
पोर्चुगल–९
स्विट्जरल्याण्ड–१५

पोर्चुगल विरुद्ध स्विट्जरल्यान्ड हेड टू हेड
पोर्चुगल जीत– ९
स्विट्जरल्याण्ड जीत– ११
ड्र– ५