वीरगंज । ‘हेराफेरी’ बलिउड फिल्मको लोकप्रिय श्रृंखलामध्ये एक हो । राजु, श्याम र बाबुरावका तीन पात्रहरु चर्चित मात्र नभएर अक्षयकुमार, सुनिल सेट्टी र परेश रावलका पर्यायबाची समेत बनेका छन् । पछिल्ला दुई महिनामा हेराफेरी तीन यसको कास्टिङको कारणले चर्चामा छ । अक्षयकुमार बाहिरिएपछि कार्तिक आर्यनले धेरैले रुचाउने फ्रेन्चाइजमा प्रवेश गर्ने पक्का भएको थियो ।
बलिउडमा खिलाडी उपनामले समेत चिनिने अक्षय स्वयंले ‘हेराफेरी ३’ नगर्ने बताएका थिए । त्यसपछि सुनिल सेट्टी र परेश रावलले फिल्ममा कार्तिक आर्यनको संलग्नताको पुष्टि गरे । लगत्तै सामाजिक सञ्जालमा दर्शक र फ्यानले ‘नो अक्षयकुमार नो हेराफेरी’ ह्यासट्गामा अभियान थाले । बलिउड वेबपोर्टल पिंकभिल्लाका अनुसार फिरोज नाडियावालाले अक्षयलाई राजु पात्रकै रुपमा फर्काउन पुनः अक्षयसँग कुराकानी सुरु गरेका छन् ।
कार्तिक आर्यनको कास्टिङका लागि कागजी प्रक्रिया सुरु भए पनि पुनः कास्टिङको अर्को चरण सुरु भएको छ । पछिल्लो १० दिनमा फिरोजले अक्षयलाई सबै मतभेद मिलाउन र उनलाई मनपर्ने फ्रेन्चाइजमा फर्काउन अक्षयलाई दुईपटक भेटेका छन् । अक्षयले फिल्मको चरित्र कत्तिको महत्वपूर्ण छ भन्ने महसुस गरेको समेत उल्लेख छ ।
