वीरगंज । प्रत्यक्ष र समानुपातिक तर्फ मधेस प्रदेशमा निर्णायक सिट ल्याएको सिके राउत नेतृत्वको जनमत पार्टीले प्रदेश सरकारको नेतृत्वमा दाबी गर्ने भएको छ । केन्द्रमा सत्ता गठबन्धनमा सहभागी हुने तयारी गरेको जनमत पार्टीले मधेस प्रदेशमा भने मुख्यमन्त्री सहित चार मन्त्रालय दाबी गर्ने जनाएको हो । निर्वाचनमा पहिलो सहभागितामै राष्ट्रिय पार्टी बनेको जनमत पार्टीका अध्यक्ष सीके राउतले मधेस प्रदेशमा आफ्नै पार्टीको नेतृत्वमा सरकार गठनका लागि दाबी गर्ने बताए । ‘हाम्रो संघर्षको पृष्ठभूमिको पहिचान मधेसका जनताले चुनावमा गरे,’ राउतले भने, ‘हामीले चुनावी प्रचारका क्रममा जनसरोकारका विषयलाई मूल मुद्दा बनायौं ।

जनताले अझै पनि राज्यबाट पाउने सेवा प्रवाहको अनुभव गर्न सकिरहेका छैनन् । सरकारमा जानु पनि आवश्यक हुन्छ । प्रदेश सरकारमा पनि जनताका आकांक्षा पूरा गर्ने धेरै अवसर छन् ।’ प्रत्यक्षतर्फ प्रदेशसभामा सप्तरीमा चार र सिरहामा दुईवटा क्षेत्र जितेको जनमत पार्टीले समानुपातिकमा कम्तीमा ७ सिट पाउने आकलन गरिएको छ । मधेसमा सत्ता गठबन्धन दलसँग सरकार बनाउन बहुमत पुग्दैन । त्यसका लागि जनमतको साथ उनीहरूले खोजेका छन् । कांग्रेस नेता विमलेन्द्र निधिले जनमत पार्टीलाई संघ र मधेस प्रदेश सरकारमा ल्याउन कोसिस गरिरहेका छन् । निधिकै पहलमा राउतले कांग्रेस सभापति एवं प्रधानमन्त्री शेरबहादुर देउवासित भेटेर दुवै सरकारमा जान सकारात्मक रहेको प्रतिक्रिया दिइसकेका छन् । विकास र सेवा प्रवाहलाई अगाडि बढाउन सरकारमा सहभागी हुने राउतले बताए । ‘शिक्षा, स्वास्थ्य र रोजगारी तथा किसानका समस्या समाधान हाम्रो पहिलो लक्ष्य हो, यससँगै विकासको गतिलाई पनि तीव्रताका साथ अगाडि बढाउनु जरुरी छ,’ उनले भने ।

अन्य दलले गठबन्धन गरेको र आफ्नो दलले एक्लै चुनाव लडेको उद्देश्य उनले मुख्यमन्त्रीका लागि दाबी गर्नु स्वाभाविक भएको जनाए । ‘सिट संख्या हेर्दा चारवटा मन्त्रालय हामीले पाउनुपर्छ,’ राउतले भने, ‘छलफल भइरहेको छ ।’जनमत पार्टीले सरकारको नेतृत्व गर्न पाए मुख्यमन्त्री को भन्ने प्रश्नमा उनले भन्न हतार हुने प्रतिक्रिया दिए । तर, राउत निकटका अनुसार जनमत पार्टीमा सुरुदेखि नै लागेका पार्टी उपाध्यक्ष वसन्त कुशवाहालाई मुख्यमन्त्रीका रूपमा अगाडि सार्ने सम्भावना छ । रौतहट घर भएका कुशवाहाको नाम समानुपातिक सूचीमा मधेसी क्लस्टरमा २ नम्बरमा छ । ‘सरकारमा सामेल हुने वा नहुने, भए मुख्यमन्त्री वा मन्त्रीको बन्ने भन्ने निर्णयको अधिकार पार्टी अध्यक्ष राउतलाई दिइएको छ,’ पार्टी महासचिव चन्दन सिंहले भने, ‘समय आएपछि अध्यक्षजीले निर्णय लिनुहुनेछ ।’ साभार : कान्तिपुर