वीरगंज । वीरगञ्जको एक मसाला उद्योगमा आगलागी हुँदा लाखौँको क्षति भएको छ । वीरगञ्ज महानगरपालिका वडा नम्बर २३ स्थित वीरगञ्ज मसाला उद्योगमा आइतबार राति भएको आगलागीमा लाखौँ बराबरको क्षति भएको हो । स्थानीय अशोककुमार यादवद्वारा सञ्चालित मसाला उद्योगमा अज्ञात कारणले आइतबार साढे ११ बजेको करिवमा भएको आगलागीका कारण ४० लाख रुपैयाँ बराबरको क्षति भएको बुझिएको छ ।
आगलागीमा उद्योगमा रहेको दुईवटा मेसिन, तयार र कच्चा अवस्थामा विभिन्न मसला, प्याकीङ्गका लागि राखिएका विभिन्न सामग्री जलेर पूर्णरुपले नष्ट भएको सञ्चालक यादवले जानकारी दिए । साँझ ७ बजेको करिवमा उद्योग बन्द गरेर घर फर्केपछि अचानक राति साढे ११ बजे तिर आगलागी भएको यादवको भनाई छ । आगलागीको कारण भने प्रष्टसँग खुल्न नसकेको उनले बताए ।
‘उद्योग बन्द गरेर हामी घर फर्किसकेका थियौं । राति अचानक स्थानीयहरुले आगलागीको जानकारी दिएपछि उद्योग पुग्दा सबै सामान जलेर नष्ठ भइसकेको थियो,’ यादवले यात्राडेलीलाई भने, ‘आगलागी किन भयो भन्ने कुरा अहिलेसम्म स्पष्ट हुनसकेको छैन । बिजुलीको तार सर्टसर्किट हुँदा भएको हुनसक्ने हाम्रो अनुमान छ । वीरगञ्ज महानगरपालिकाबाट गएको दुई वटा वारुण यन्त्र, स्थानीय वासिन्दा, नेपाल प्रहरी र सशस्त्र प्रहरीको सहयोगमा आगलागी नियन्त्रणमा आएको यादवले बताए । साभाल : यात्रा डिलि
