वीरगंज । प्रहरीले पछिल्लो समय साइबर अपराधका घटना बढिरहेकाले सजक रहन सर्वसाधरणलाई आग्रह गरेको छ । सोमबार प्रहरी प्रधान कार्यालयको साइबर ब्युरोले केही समयदेखि आपराधिक समूहले प्रविधिको दुरुपयोग गरी सामाजिक सञ्जालमार्फत ठगीका गतिविधि गरिरहेको जनाएको छ । साइबर ब्युरोले ठगीका प्रवृत्तिबारे पनि जानकारी दिएको छ । यस्ता ठगिने प्रवृत्तिबाट सजग रहन आग्रह गरिएको छ ।
कसरी हुन्छ अनलाइन ठगी ?
१. अनलाइनमा मात्रै चिनजान भएको साथीले गिफ्ट पठाइदिने भनि प्रलोभनमा पार्ने र उक्त गिफ्ट प्राप्त गर्न Tax Clearance गर्नुपर्ने बाहाना बनाई रकम माग गर्ने ।
२. तपाईंको नाममा अनलाइन चिठ्ठा पन्यो, उक्त चिठ्ठा प्राप्त गर्नको लागि Tax Clearance को विभिन्न बहाना बनाई रकम माग गर्ने ।
३. सामाजिक सञ्जाल ह्याक गरी उक्त सामाजिक सञ्जाल प्रयोगकर्ताका निकटतम साथी पहिचान गरी विभिन्न बर बाहानामा रकम माग गर्ने ।
४. साथीभाइको सामाजिक सञ्जालबाट जरुरी कोड नम्बर पठाएको छु भनि OTP (One Time Password) माग गरी सम्बन्धीत खातावालाको खाताबाट रकम निकाल्ने ।
५. अनलाइनमा सस्तोमा सामान बिक्रीमा राख्ने र समान पठाउनु पहिले नै रकम असुल गरी सामान आपूर्ति (Delivery) नगर्ने ।
६. सामाजिक सञ्जालमार्फत प्रेमजालमा पारी अनेकन बहाना बनाई बैंकको खाता खोल्न लगाई ATM कार्ड, OTP लगायतको विवरण लिने ।
७. भिडियो भाइरल गरीदिन्छु भनी रकम माग गर्ने ।
८. क्रिप्टोकरेन्सी/बिट क्वाइनमा लगानी गरे आर्थिक लाभ फाईदा तुरुन्त डबल हुन्छ भनि रकम माग गर्ने ।
