वीरगंज । कात्तिकको ११ गतेदेखि प्रदर्शनमा आएको हरिवंश आचार्य अभिनित चलचित्र ‘महापुरुष’ शुक्रवार भोलिदेखि पाँचौं हप्तामा प्रवेश गर्दैछ । यो चलचित्रले पाँचौं हप्तामा पनि हलमा उल्लेख्य शोज पाएको छ । शुक्रवार चलचित्रलाई मल्टिप्लेक्सअन्तर्गतको ‘क्यूएफएक्स सिनेमाज’ले १४ शोज उपलब्ध गराएको छ ।
भोलिदेखि नयाँ नेपाली चलचित्र ‘मीलन’ प्रदर्शनमा आउँदैछ । यद्यपि, नयाँ चलचित्रले भन्दा पाँचौं हप्तामा पनि ‘महापुरुष’ले बढी शोज पाएको हो । चलचित्र ‘मीलन’लाई प्रदर्शनको पहिलो दिन क्यूएफएक्सले जम्मा ६ शोज उपलब्ध गराएको छ । प्रर्याप्त प्रचारप्रसारबीना प्रदर्शनमा आउन लागेको ‘मीलन’मा सलोन बस्नेत, कुशलशाह ठकुरी, शिल्पा थापा, शिशिर वाङ्देल, विशाल पहारी, जानुका पौडेललगायतको अभिनय छ । मित्रता, प्रेम र पारिवारिक कथामा निर्माण भएको चलचित्रलाई टेक पौरखी राईले निर्देशन गरेका हुन् ।
हलमा केही समय टिकिरहन यस चलचित्रले दर्शक प्रतिक्रिया राम्रो पाउनुपर्ने देखिन्छ । प्रदीप भट्टराईको लेखन एवं निर्देशन रहेको ‘महापुरुष’दर्शकहरुबाट पाएको सकारात्मक प्रतिक्रियाकै कारण हलमा लामो समय टिकिरहन सफल भएको हो । हरिवंशसँगै मदनकृष्ण श्रेष्ठ, गौरी मल्ल, अरुण क्षेत्री, रवीन्द्र सिंह बानियाँ, अञ्जना बराईली, राजाराम पौडेललगायतको अभिनय रहेको चलचित्रले अमेरिका र अष्ट्रेलियामा समेत राम्रो ब्यापार गरेको छ ।