वीरगंज । पर्सामा नेपाली कांग्रेसले कम ब्याक गरेको छ । २०७४ सालको निर्वाचनमा चारवटै प्रतिनिधि सभामा हारेर ८ मध्ये २ प्रदेश सभामा मात्रै जितेको कांग्रेसले यसपटक २ वटा प्रतिनिधि र ३ प्रदेश सभामा जितेर पूरानो विरासत फर्काएको हो । एकताका कांग्रेसको गढ भनेर चिनिने पर्सा जिल्लामा बिचमा कमजोर भएको कांग्रेस फेरी बलियो सावित भएको छ । पर्साको क्षेत्र नम्बर २ र ४ मा भारी मतान्तरका साथ विजयी हुनुका साथै पर्सा क्षेत्र नम्बर २ (क), ३ (ख) र ४ (क) मा पनि जित निकालेर कांग्रेसले कम ब्याक गरेको हो । नेपाली कांग्रेसबाटै यहाँको क्षेत्र नम्बर १ बाट २०५८ सालको आम निर्वाचनमा जितेर स्वर्गीय कृष्ण प्रसाद भट्टराई प्रधानमन्त्रीसमेत भए । २०६४ सालको पहिलो संविधान सभा निर्वाचनमा पर्साका ३ क्षेत्रमा कांग्रेसले कब्जा गर्यो ।
क्षेत्र नम्बर १ मा मधेशी जनअधिकार फोरमबाट करिमा बेगम निर्वाचित हुँदा क्षेत्र नम्बर २, ३ र ४ बाट क्रमश कांग्रेसकै अजय द्विवेदी, सुरेन्द्र चौधरी र रमेश रिजाल निर्वाचित भए । २०७० सालमा भएको दोस्रो संविधान सभामा पनि कांग्रेसले २ वटा क्षेत्रमा जित निकाल्यो । क्षेत्र नम्बर १ मा राजेन्द्र बहादुर अमात्यले जित्दा क्षेत्र नम्बर ४ बाट सुरेन्द्र चौधरी निर्वाचित भएका थिए । क्षेत्र नम्बर २ र ३ मा भने क्रमशः नेकपा एमालेका विचारी प्रसाद यादव र राजकुमार गुप्ताले जिते । त्यतिबेलासम्म पनि पर्सामा कांग्रेस सशक्त पार्टीको रुपमा स्थापित भयो । २०७० सम्ममा भर्खरै स्थापना भएका मधेशवादी दलले २०७२ मा संविधान बनीसकेपछि २०७४ मा भएको पहिलो आम निर्वाचनमा भने कांग्रेसको विरासत खोस्दै कब्जा जमायो ।
चारवटै क्षेत्रमा मधेशवादी दलले जिते । पर्सा १, २ र ३ मा तत्कालिन संघीय समाजवादी फोरमबाट क्रमश प्रदीप यादव, बिमल श्रीवास्तव र हरिनारायण रौनियारले जित्दा क्षेत्र नम्बर ४ बाट तत्कालिन राष्ट्रिय जनता पार्टी (राजपा) का लक्ष्मणलाल कर्ण निर्वाचित भए । प्रदेशसभामा पनि कमजोर सावित हुँदै कांग्रेसले जम्मा २ सिट हात पार्न सफल रह्यो । पर्साको क्षेत्र नम्बर २ (क) बाट राजेश्वर साह तेली र ४ (क) बाट शंकर चौधरीले कांग्रेसको अस्तित्व जोगाइराखे । कांग्रेसले त्यतिबेलादेखि पर्सा जिल्लामा गुमाएको साख २०७९ को प्रदेश तथा प्रतिनिधिसभा निर्वाचनमा फर्काएको छ । यसपटक पर्साको क्षेत्र नम्बर २ र ४ मा भारी मतका साथ कांग्रेसका अजय चौरसिया र रमेश रिजाल निर्वाचित हुँदा ३ वटा प्रदेशसभामा पनि कांग्रेसले जित निकालेको छ । क्षेत्र नम्बर २ (क) मा श्याम पटेल, ३ (ख) मा जनार्दन सिंह क्षेत्री र ४ (क) मा शंकर चौधरी कांग्रेसबाट निर्वाचित भएका छन् । साभाल : यात्रा डेलि
