वीरगंज । नेपाल र पाकिस्तानबीच बुधबार दशरथ रंगशालामा अन्तर्राष्ट्रिय मैत्रीपूर्ण खेल हुँदैछ । त्यसअघि आयोजित प्री–म्याच कन्फ्रेन्समा नेपाली टिमका कप्तान रोहित चन्दले पाकिस्तान प्रतिद्वन्द्वीका रूपमा जहिले पनि कठिन रहेको बताएका छन् । उनी पहिलोपल्ट नेपाली टिमको कप्तानी गर्दैछन् । यो नेपालका लागि ऐतिहासिक खेल पनि रहनेछ । नेपालले दशरथ रंगशालामा खेल्ने यो ५० औं आधिकारिक खेल हुनेछ । नेपाली टिमको नेतृत्व सम्हाल्न पाएको खुसी व्यक्त गर्दै रोहितले भने, ‘नेपालका लागि पाकिस्तान जहिले पनि कठिन प्रतिद्वन्द्वी हुने गर्छ ।
हामी पाकिस्तानविरुद्धको अन्तिम खेलमा पनि पराजित रहेका थियौं ।’नेपाल पाकिस्तानको अन्तिम पकट साफ च्याम्पियन्समा सन् २०१८ मा सामना गर्दा पराजित रहेको थियो । रोहितले थपे, ‘तर हामीले राम्रो तयारी गरेका छौं र सकारात्मक नतिजाको अपेक्षा गर्छौं । पाकिस्तानी टिमका कप्तान हसन बासिरले पनि नेपालविरुद्ध आफ्नो टिमको प्रदर्शनको इतिहास राम्रो भएको भन्दै त्यस्तै नतिजाका लागि खेल्ने बताए । पाकिस्तान फिफाको प्रतिबन्धपछि पहिलो पटक अन्तर्राष्ट्रिय खेल खेल्दैछ । त्यसैलाई लक्षित गर्दै बासिरले भने, ‘पछिल्ला केही समय हाम्रो लागि राम्रो रहेन ।
फिफा प्रतिबन्ध हटेपछि फेरि खेल्न पाउनु हाम्रो लागि खुसीको उपलब्धी हो । हामी यो अवसरलाई पूरा सदुयोग गर्न चाहन्छौं । हामीले पछिल्लो समय राम्रो तयारी पनि गरेका छौं ।’पाकिस्तानी टिमका प्रशिक्षक सहजाद अनवरले पनि आफ्नो टिम फेरि अन्तर्राष्ट्रिय फुटबलमा फर्केकोमा खुसी व्यक्त गरे । नेपालले भने प्रशिक्षक प्रवेश कटुवालको नेतृत्वमा पहिलो पल्ट खेल्दैछ । उनले प्रि–म्याच कन्फ्रेन्समा नेपाली टिमको तयारी पूरा भएको बताए । साथै उनले आफूहरूले नेपाललाई बलियो चुनौती पेस गर्ने बताए ।
