वीरगंज । सुर्खेत प्रहरीले ७३ वर्षीया वृद्धाको हत्या गरेको आरोपमा एक जनालाई पक्राउ गरेको छ । लेकवेशी नगरपालिका-९ चौरासेस्थित तिल्के पानीमा बस्दै आएकी अन्दाजी ७३ वर्षीया डिल्लीसरा जैसी (भण्डारी) को हत्या आरोपमा सोही ठाउँका ३३ वर्षीय शालिकराम बास्तोलालाई प्रहरीले पक्राउ गरेको हो ।

सोमबार साँझ बास्तोला र जैसीबीच वादविवाद भएको अनुसन्धानका क्रममा खुलेको कर्णाली प्रदेश प्रहरी कार्यालयले सुर्खेतले जनाएको छ । डिल्लिसरा बस्दै आएको घरदेखि करिब एक हजार पाँच सय मिटरको दुरीस्थित कच्ची घरमा विवाद हुँदा वास्तोलाले धकेलेपछि ढुंगामा टाउको ठोक्किदा मृत्यु भएको प्रहरीले जनाएको छ ।

‘छिमेकीहरूले आज (मङ्गलवार) बिहान मात्रै मृत अवस्थामा शव देखेपछि प्रहरीलाई खबर गरेका थिए,’ कार्यालयका प्रवक्ता माधवप्रसाद श्रेष्ठले भने, ‘जिल्ला प्रहरी कार्यालय सुर्खेत र इलाका प्रहरी कार्यालय लेकवेशीको टोलीले अनुसन्धान गर्दा बास्तोला कालिदमारमा बहिनीको घरमा लुकेको अवस्थामा पक्राउ परेका हुन् ।’ जैसी र बास्तोला नाताले सासू-ज्वाइँ हुन् ।