वीरगंज । फिफा विश्वकप फुटबल-२०२२ को प्रत्यक्ष प्रसारण विवादबारे मिडिया हबले दिएको भ्याकेट निवेदनमा सर्वोच्च अदालतले आज सोमबार कुनै निर्णय दिएन । मिडिया हबले अन्तरिम आदेश खारेज गर्न दिएको निवेदनमा सोमबार सुनुवाइ भए पनि अन्तरिम आदेश खारेज हुने अथजा नहुने बारेमा भने कुनै निर्णय भएन । न्यायाधीश विश्वम्भरप्रसाद श्रेष्ठ र हरिप्रसाद फुयाँलको संयुक्त इजलासमा सोमबार सुनुवाई भएको हो । सोमबारको सुनुवाइपछि सर्वोच्चले विपक्षीलाई पनि यसबारे जानकारी दिएर कात्तिक ३० गते बुधवार मात्रै छलफल गर्ने आदेश दिएको छ ।
सोमबार मिडिया हबको निवेदनमा सुनुवाइ गर्दै विपक्षी रिट निवेदक अधिवक्ताद्वय अनुपम भट्टराई तथा किशोर पौडेललाई पनि यसबारे जानकारी दिने तथा ३० गते बुधवार सँगै राखी छलफल गर्ने आदेश दिएको हो । मिडिया हबले विश्वकप फुटबल प्रसारण गर्दा नेपालमा टेलिभिजनका ग्राहकसँग थप पाँच सय रुपैयाँ शुल्क लिने प्रक्रिया अगाडि बढाएपछि अधिवक्ताद्वयले कात्तिक २० गते रिट दायर गरेका थिए ।
केही दिनअघि सर्वोच्चले रिटको पक्षमा अल्पकालीन अन्तरिम आदेश जारी गर्दै दुवै पक्षलाई छलफलका लागि कात्तिक ३० गते बोलाएको थियो । यद्यपि, कात्तिक ३० गते सुनुवाइ हुँदा प्रसारणमा असर गर्ने भन्दै मिडिया हबले अल्पकालीन आदेश खारेज गर्न माग गर्दै भ्याकेट निवेदन दिएको थियो । यो संगै विश्वकप फुटबल हेर्न थप शुल्क तिर्नु पर्ने अथवा नपर्ने भन्ने निर्णय अब बुधवार मात्रै टुंगो लाग्ने भएको छ ।
