वीरगंज । अमेरिका जानका लागि दोहोरो नागरिकता र राहदानी लिएको अभियोगमा एक व्यक्ति पक्राउ परेका छन् । उदयपुरको साविक मैनामैनी गाविस ८ (हाल बेलका नगरपालिका वडा नं. ७) घर भएका ४२ वर्षीय अशोक राई भन्ने ओमबहादुर राई दोहोरो नागरिकता र राहदानी बनाएको अभियोगमा पक्राउ परेका हुन् ।

दोहोरो नागरिकता र राहदानी बनाई अमेरिका जान लागेको भन्ने गोप्य सूचनाको आधारमा अनुसन्धान थालेको प्रहरीले अमेरिकी दूतावाससँगको समन्वयमा उनलाई नियन्त्रणमा लिएको हो । शुक्रवार प्रहरीको महानगरीय अपराध अनुसन्धान महाशाखाबाट खटिएको विशेष टोलीले महाराजगन्जस्थित अमेरिकी दूतावास नजिकैबाट दुई वटा नागरिकता र दुई वटा राहदानीसहित उनलाई नियन्त्रणमा लिएको हो ।

उनलाई नागरिकता ऐन र राहदानी ऐनअन्तर्गतको कसूरमा आवश्यक कारबाहीका लागि जिल्ला प्रहरी परिसर टेकु पठाइएको प्रहरीले जानकारी दिएको छ ।