वीरगंज । प्रधानमन्त्री कप एकदिवसीय क्रिकेट प्रतियोगितामा मधेस प्रदेशले विजयी सुरुआत गरेको छ । बिहीबार मुलापानी क्रिकेट मैदानमा भएको खेलमा मधेसले प्रदेश–१ लाई ७२ रनले पराजित गर्याे । मधेसले प्रस्तुत गरेको २१५ रनको लक्ष्य पछ्याएको प्रदेश–१ ले ४३.१ ओभरमा सबै विकेट गुमाएर १४२ रनमात्र बनाउन सक्यो ।
प्रदेश–१ लाई सस्तैमा समेट्न मोहम्मद आदिल आलम, रुपेश सिंह, प्रदीप पासवान र विशाल सुस्लिङले समान दुई विकेट लिए । राजेश यादवले एक विकेट हात पारे । प्रदेश–१ का लभ कामतले २९, विवेक आनन्द मेहताले २५, फिर्दोस अन्सारीले २२ र मनिष थापाले ११ रन जोडे । यसअघि टस हारेर ब्याटिङमा आएको मधेसले ४८.१ ओभरमा सबै विकेट गुमाएर २१४ रनको योगफल तयार पारेको थियो । मधेसलाई सम्मानजक योगफलसम्म पुर्याउन अनिल साहले ६१ रन बनाएका थिए । विवेक यादवले ३२, रुपेश सिंहले ३०, रोहन विकले २८ र कप्तान हरिशंकर साहले १५ रन बनाए ।
प्रदेश–१ बाट उत्कृष्ट बलिङ गरेका फिर्दोस अन्सारीले पाँच विकेट लिएका थिए । अन्सारीले ९.१ ओभरमा एक मेडन फ्याक्दै ३४ रन खर्चिएका थिए । कप्तान सिदान्त लोहनीले तीन विकेट लिँदा श्रवण यादव र लभ कामतले एक–एक विकेट लिएका थिए । प्रतियोगिताको पहिलो खेलमा जित निकालेको मधेस समूह ‘बी’ को दोस्रो स्थानमा उक्लिएको छ । समान तीन खेलबाट दुई अंक जोडेको प्रदेश–१ चौथो स्थानमा छ । पाँच टिम रहेको समूहबाट शीर्ष दुई टिमले सेमिफाइनल यात्रा तय गर्नेछन् ।
