वीरगंज । मकवानपुरमा बसकाे ठक्करबाट एक जनाको मृत्यु भएको छ । मदन भण्डारी लोकमार्गको हटिया सडकखण्ड अन्तरगत हेटौँडा उपमहानगरपालिका वडा नंबर १७ कठायत चोकमा बसले ठक्कर दिँदा सोही स्थानका सोम गोलेको मृत्यु भएको हो । हेटौँडाबाट फापरबारी जाँदै गरेको ना ४ ख ४०२२ नम्बरको बसले अन्दाजी ४२ वर्षका गोलेलाई ठक्कर दिएको थियो ।

बसको ठक्करबाट गम्भीर घाइते भएका गोलेको हेटौँडा अस्पतालमा उपचारमा लैजाने क्रममा मृत्यु भएको जिल्ला प्रहरी कार्यालय मकवानपुरका प्रहरी प्रवक्ता डिएसपी टेकबहादुर कार्कीले बताए । बस र बस चालकलाई प्रहरीले नियन्त्रणमा लिएको छ । आजै दिउँसो कठायत चोक नजिकै हेटौँडा १८ मा मोटरसाइकलले ठक्कर दिँदा अर्का एक स्थानीयको मृत्यु भएको थियो ।

धरान चतरा सडकखण्ड अन्तरगत हेटौँडाबाट ठुलोदमार तर्फ जाँदै गरेको बा ५८ प ५६५४ नम्बरको मोटरसाइकलले पैदल यात्री हेटौँडा १८ रामधुनीका ३५ वर्षीय बिनोद रमतेललाई ठक्कर दिएको थियो । ठक्करबाट गम्भीर घाईते भएका रम्तेलको उपचारका क्रममा हेटौँडामा मृत्यु भएको थियाे । चाडपर्वको समयमा तीव्र गतिमा सवारी नचलाउन प्रहरीले अनुरोध गर्दै टाइम कार्ड लागू गरेको छ । तर, मोटरसाइकलहरूमा हुने तीव्र गति प्रहरीले पनि रोक्न सकेको छैन ।