रौतहट । जिल्लामा अवैध काठ सहित पक्राउ परेका ट्रक छुटाउन विभिन्न शक्तिहरूले वन कर्मचारीहरूलाई दवाव दिन थालेका छन्।सोमबार विहान सशस्त्र वन गस्ती टोलीले अवैध चिरान काठसहितको एउटा ट्रक बरामद गरेको हो। डिभिजन वन कार्यालय रौतहटबाट सहायक वन अधिकृत बैजनाथ मण्डलको नेतृतवमा गएको गस्ती टोलीले ना २ ख ८७१७ नम्बरको ट्रकमा अवैध तरिकाबाट साल जातको चिरान काठसहित एउटा ट्रक बरामद गरेको हो।चन्द्रपुर नगरपालिका वडा नं–२ जुडीबेला गाउँबाट अवैध काठ लोड गरी चन्द्रनिगाहपुर तर्फ आउनेक्रममा सशस्त्र वन गस्तिटोलिले चाँदीखोला पुलछेउबाट ट्रकलाई नियन्त्रणमा लिएको थियो।

बरामद ट्रकमा १ सय ५० क्यूबिफिट भन्दा बढी अवैध चिरान काठ फेला परेको डिभिजन वन कार्यालय रौतहटका प्रमुख सुनिलकुमार कर्णले बताएका छन। सशस्त्र वन गस्ती टोलीलाई हेरेर ट्रक चालक ट्रक छोडेर फरार भएको प्रमुख कर्णले जानकारी दिए। बरामद काठ सहितको ट्रक आवश्यक कारबाहीका लागि डिभिजन वन कार्यलय रौतहटमा बुझाइएको सहायक वन अधिकृत बैजनाथ मण्डलले बताए। ट्रक आवश्यक कारबाहीका लागि डिभिजन वन कार्यालय रौतहटमा बुझाएपछि ट्रक छुटाउन डिभिजन वन कार्यालय रौतहटका प्रमुख सुनिल कर्णलाई विभिन्न व्यक्तिले दवाब दिन थालेको स्रोतले जानकारी दियो।

‘पक्राउ परेका ट्रक छुटाउन ठुला ठुला शक्तिहरू सक्रिय भएर लागेका छन्’, स्रोतले भन्यो। यस विषयमा डिभिजन वन कार्यालय प्रमुख सुनिल कुमार कर्णलाई सोध्दा जुनसुकै दवाव आएपनि नियन्त्रणमा लिएको ट्रकलाई कानुन बमोजिम कारबाही गरेर छाड्ने प्रतिक्रिया दिए।