सर्लाही । सर्लाहीको वागमतीस्थित मिलनचोकमा रहेको एक सहकारी संस्थाको सेवा केन्द्रमा लुटपाट भएको छ । बुधबार बिहान १० बजेतिर वागमती-१ मिलनचोकमा रहेको सगुन बचत तथा ऋण सहकारी संस्थाको सेवा केन्द्रमा लुटपाट भएको हो । केन्द्रका प्रमुख लालबन्दी नगरपालिका-२ जुटपानी निवासी अन्दाजी ३० वर्षका साजन कार्कीमाथि लुटेरा समूहले गोली प्रहर गरी लुटपाट गरेको प्रहरीले जनाएको हो ।

बिहान १० बजेतिर आएका तीनजनाले कार्कीलाई पैसा दिन धम्क्याएका थिए । प्रतिकार गरेपछि लुटेरा समुहले गोली प्रहार गरेको घाइते कार्कीलाई उदृत गर्दै सहकारीका अध्यक्ष केशव ढकालले जानकारी दिए । घाइते कार्कीका अनुसार लुटेराहरू भारतीय नम्बर प्लेटको मोटरसाइकलमा आएका थिए । कार्कीलाई चार वटा गोली लागेको इलाका प्रहरी कार्यालय हरिवनले जनाएको छ । लुटेरा समूहले चलाएको गोली कार्कीको पाखुरा, तिघ्रा, कुम र कोखामा लागेको छ । गोली लागेका कार्कीलाई हरिवनस्थित सरस्वती अस्पतालमा सामान्य उपचारपछि थप उपचारको लागि काठमाडौं रेफर गरिएको अस्पतालका डा. राजिव साहले बताए । लुटेरा समूहले कार्कीमाथि कार्यालय खोल्नेबित्तिकै आक्रमण गरेको घाइतेलाई उदृत गर्दै सहकारीका कर्मचारी दिनेश श्रेष्ठले बताए ।

‘उनीहरूले बिहान कार्यालय खोलेलगत्तै आक्रमण गरे ।’ घाइतेलाई उदृत गर्दै श्रेष्ठले भने, ‘कार्कीले ब्यागमा लगेको पैसा ड्रएरमा खन्याई सकेकोले उनीहरूले ब्यागमात्र लिएर गएको प्रारम्भिक जानकारी आएको छ ।’लुटेरा समूहले केही दिनदेखि उक्त शाखामा कार्यरत कार्कीको निगरानी गरिरहेको समेत आशंका छ । मंगलबार मात्र पनि लुटेरा समूह सोही कार्यालय आसपास घुमिरहेका देखिएको छ । घटनालगत्तै लुटेरा समूह दक्षिणतर्फ फरार भएको स्थानीयको भनाइ छ । उनीहरूको खोजी भइरहेको र घटनाको अनुसन्धान भइरहेको जिल्ला प्रहरी कार्यालय सर्लाहीले जनाएको छ । हरिवनमा मुख्य कार्यालय रहको सगुन सहकारी संस्थाले वागमतीको मिलनचोक लालबन्दी, ईश्वरपुरलगायत स्थानमा सेवा कार्यालय सञ्चालन गरेको छ ।