वीरगंज । इबोला महामारीसँग लडिरहेको युगान्डाका दुई जिल्लामा तीन साता लामो लकडाउन आदेश जारी गरिएको छ । मुवेन्डे र नजिकको कास्सान्डामा बार, नाइट क्लब, प्रार्थनास्थलहरू र अरू मनोरन्जनात्मकस्थलहरू बन्द रहने तथा कर्फ्यु लागु हुने बताइएको छ । केही समयअघिसम्म युगान्डाका राष्ट्रपति योवेरी मुसेभेनीले इबोलाविरुद्ध लड्नका लागि यस्तो कदम आवश्यक नहुने बताएका थिए ।
पछिल्लो महामारीमा १९ जनाको ज्यान गइसकेको छ । ५८ संक्रमित भेटिएका छन् । तर, मृतकको संख्या योभन्दा बढी हुन सक्ने बताइएको छ । गएको सेप्टेम्बरको सुरुमा राजधानी कम्पालादेखि करिब ८० किलोमिटर टाढाको मुवेन्डेमा पुनः इबोला महामारी देखिएको हो । अझै पनि सो स्थान महामारीको केन्द्रविन्दुका रूपमा छ । यसअघि, राष्ट्रपति मुसेभेनीले इबोला कोभिड–१९ जस्तो हावाबाट पनि फैलने भाइरस नभएकाले यसको नियन्त्रणका लागि लकडाउन गर्नु नपर्ने बताएका थिए ।
अहिले लकडाउन गरिएका क्षेत्रमा कार्गो ट्रकहरूलाई भने निर्वाध रूपमा प्रवेश दिइने बताइएको छ । टेलिभिजनमार्फत मुलुकलाई सम्बोधन गर्दै राष्ट्रपतिले भनेका छन्, “इबोला नियन्त्रणका लायि यी अस्थायी उपायहरू अपनाइएका हुन् । यथासम्भव छिटो यस महामारीको अन्त्यका लागि हामी सबैले सम्बन्धित निकायलाई सहयोग गर्नुपर्छ ।” उनले संक्रमित भएर पनि आइसोलेसनमा बस्न नमान्नेलाई गिरफ्तार गर्न प्रहरीलाई निर्देशन दिइसकेका छन् ।
