वीरगंज । राष्ट्रपति विद्यादेवी भण्डारीले वाङ्मय शताब्दी पुरुष सत्यमोहन जोशीको निधनबाट मुलुकले एक अथक स्रष्टा एवं अभिभावक गुमाएको पीडाबोध भएको बताएकी छन् ।
आइतबार बिहान ट्विट गर्दै उनले ‘जोशीको सार्थक जीवन हामी सबैका लागि प्रेरणाको अजस्र स्रोत’ भएको उल्लेख गरेकी छन् । उनले संस्कृतिविद् जोशीको निधनप्रति हार्दिक श्रद्धाञ्जली व्यक्त गरेकी छन् ।
“वाङ्मय शताब्दी पुरुष सत्यमोहन जोशीको निधनबाट मुलुकले एक अथक स्रष्टा एवं अभिभावक गुमाएको पीडाबोध भएको छ,” राष्ट्रपति भण्डारीको ट्विटमा लेखिएको छ, “उहाँको सार्थक जीवन हामी सबैका लागि प्रेरणाको अजस्र स्रोत हो । अमर सत्यमोहनप्रति हार्दिक श्रद्धाञ्जली !”संस्कृतिविद् जोशीको उपचारका क्रममा आज बिहान ७ बजेर ९ मिनेटमा ललितपुरको ग्वार्कोस्थित किस्ट मेडिकल कलेजमा निधन भएको जनाइएको छ ।
