वीरगंज । अविरल वर्षाका कारण बर्दियाको राजापुर नगरपालिकाका झन्डै आठ सय घर डुबानमा परेका छन् । गएकाे सोमवार बेलुकादेखि पसेको कर्णाली नदीको बाढीका कारण कर्णाली आसपासका केही गाउँ डुबानमा परेका हुन् । स्थानीयवासीका अनुसार डुबानमा परेर धेरैजसो धरको क्षति दौलतपुर गाविसमा भएको छ । अहिले पालिका र जिल्ला प्रहरी कार्यालयको सहयोगमा उद्धारको काम भइरहेको स्थानीयवासीले बताए । कर्णालीको पानीको सतह नघटेकाले अझै डुबानको खतरा कायमै रहेको छ । स्थानीय टीकाराम जोशीले बाढीका कारण घर डुबानमा पर्दा परिवार कहाँ छन् भन्ने कुरा पनि थाहा पाउन नसकेको गुनासो गर्नुभयो । उहाँले कर्णालीको पानीको बहाव कम हुने छाँटकाँट नदेखिएकाले कसरी बाँच्ने भन्ने समस्या भएको बताउनुभयो ।
त्यस्तै बर्दियाकै राजापुर नगरपालिका–१ दौलतपुरका स्थानीय लोकराज ढुंगानाले सोमवार बेलुकादेखि बाढी गाउँ पसेको र नदीमा पानीको बहाव बढिरहेकाले झनै समस्या थपिएको गुनासो गर्नुभयो । बस्ती नै डुबानमा पर्दासमेत सरकारले उद्धार नगरेकाे र राहत नदिएको भन्दै स्थानीयवासी आक्रोशित छन् । गएकाे वर्षकाे बाढीका कारण पनि गाउँ डुबानमा परेको तर सरकारले कुनै राहत नदिएको भन्दै प्रधानमन्त्री शेरबहादुर देउवालाई यस वर्षको चुनावमा पश्चिमका नागरिकले परास्त गर्ने उनीहरू बताउँछन् । अविरल वर्षाका कारण पश्चिम तराईका जिल्लामा बाढी र डुबानका कारण जनजीवन प्रभावित बनेको छ । गएकाे पाँच दिनयता भइरहेको वर्षाले देशभरका पहाडी जिल्लामा पनि पहिरोको जोखिम बढाएको छ ।
खहरे खोलामा आएको बाढी र विभिन्न ठाउँमा गइरहेको पहिरोका कारण गाडी आउजाउमा समस्या भइरहेको छ । जल तथा मौसम विज्ञान विभागले पछिल्लो २४ घण्टामा प्रदेश १, लुम्बिनी प्रदेश, कर्णाली प्रदेश र सुदूरपश्चिम प्रदेशका केही ठाउँमा र बाँकी प्रदेशका थोरै ठाउँमा मेघगर्जन/चट्याङसहित हल्कादेखि मध्यम वर्षाको सम्भावना रहेको र ती क्षेत्रमा भू–क्षय, पहिरो तथा गेग्रान बहावको जोखिम हुनुका साथै सडक तथा हवाई यातायातमा सामान्य प्रभावको सम्भावना रहेकाले सतर्कता अपनाउन आग्रह गरेको छ । नदी नाला तथा खहरे खोलाहरूमा पानीको सतह बढ्नुका साथै बाढी आउन सक्ने र कृषि, पर्यटन, पर्वतारोहणलगायत दैनिक जनजीवनसमेत प्रभावित हुनसक्ने भएकाले आवश्यक सतर्कता अपनाउन आग्रह गरेको छ ।
