वीरगंज । बाराबाट ठूलो परिणाममा नक्कली नोट सहित ३ जना पक्राउ परेका छन् । पक्राउ पर्नेहरुमा भारत बिहार राज्यका रञ्जित कुमार मुखिया, बारा कलैया उपमहानगरपालिका वडा नम्बर १५ बस्ने सैनुल्लाह अंसारी, बारा सिम्रौनगढ नगरपालिका वडा नम्बर २ बस्ने बिनाका मुखिया रहेका छन् । उनीहरुको साथबाट ९ लाख रुपैयाँको नक्कली नोट बरामद भएको जिल्ला प्रहरी कार्यालय बाराले जनाएको छ ।

इलाका प्रहरी कार्यालय सिम्रौनगढको टोलीले सिम्रौनगढ वडा नम्बर ५ कनकपुर टोलबाट उनीहरुलाई पक्राउ गरेको जिल्ला प्रहरी कार्यालय बाराका प्रमुख प्रहरी उपरीक्षक होबिन्द्र बोगटीले बताए । सुरुमा प्रहरीले रञ्जितले कम्मर पेटीको भागमा लुकाएर ल्याएको नेपाली १ हजार दरका नोटको १ ठेली र उसले चलाएर आएको मोटर साइकलको सिट मुनीबाट ८ ठेली गरी ९ ठेली नक्कली जस्तो देखिने ९ लाख नोट फेला पारेको थियो ।

नक्कली नोट सहित पक्राउ परेकाहरुलाई थप अनुसन्धान कारवाही अगाडि बढाईएको उनले बताए । सीमावर्ती क्षेत्रमा नक्कली नोटको कारोबारीहरुको बिगबिगी रहेको सूचनाको आधारमा सीमावर्ती बाराको सिम्रौनगढ क्षेत्रलाई केन्द्रित गरेर सुरक्षा चेकजाँचलाई कडाई गर्दा नक्कली नोट सहित पक्राउ गर्न सफल भएको प्रहरी उपरीक्षक वोगटीको भनाई छ ।