वीरगंज । कालिकोटमा मलामी गएका १५ जना सम्पर्कविहीन भएका छन् । तिलागुफा नगरपालिकाको वडा नम्बर ४ राँचुली गाउँमा मलामी गएका उनीहरु आइतबारदेखि सम्पर्कविहीन भएका हुन् । आइतबार दिउँसो १ बजेतिर मलामी गएका उनीहरु अझै सम्पर्कमा नआएको जिल्ला प्रहरी कार्यालय कालिकोटले जनाएको छ ।

उक्त घटनाबारे प्रहरीलाई सोमबार आज बिहान ७ बजे मात्र खबर गरिएको कालिकोट प्रहरीले जनाएको छ । कालिकोट प्रहरीका सूचना अधिकारी शुरेशराज बमका अनुसार अहिले प्रहरी घटनास्थलतर्फ गइरहेको छ । फोन सम्पर्क नहुँदा विस्तृत विवरण आएको छैन । घटनास्थलमा प्रहरी पुगेपछि मात्र थाहा हुने उनले बताए ।

प्रहरी चौकी नाग्मगाड र खल्लागाडबाट दुई टोली घटनास्थलतर्फ पठाइएको उनले बताए । बाढी पहिरोका कारण बाटो अबरुद्ध भएका कारण प्रहरीले जेसिबी साथमा लिएर त्यसतर्फ गएको बमले बताए ।शनिबार मृत्यु भएका स्थानीय युवक हेमराज शाहीको मलामीमा तिला नदीमा गएका वडाध्यक्ष परमबहादुर शाहीसहितका १५ जना सम्पर्कविहीन भएका हुन् ।