वीरगंज । राष्ट्रपति विद्यादेवी भण्डारीले सर्वसाधारण र उच्च पदस्थ अधिकारीलाई टीका लगाइदिएकी छन् । बुधवार सितलनिवासमा राष्ट्रपति भण्डारीले आम सर्वसाधारणलाई दसैँको उपलक्ष्यमा टीका लगाइदिएकी हुन् । सो अवसरमा राष्ट्रपति भण्डारीले राष्ट्रिय सभाका अध्यक्ष गणेशप्रसाद तिमिल्सिना, निलम्वित प्रधानन्यायाधीश चोलेन्द्र समशेर जबरा, कार्यवाहक प्रधानन्यायाधीश हरिकृष्ण कार्की, प्रधान सेनापति प्रभुराम शर्मा, कानुन, न्याय तथा संसदीय मामिलामन्त्री गोविन्दप्रसाद शर्मा कोइरालालाई राष्ट्रपतिले टीका लगाइदिएकी हुन् ।
उनले नेपाल प्रहरीका महानिरीक्षक धिरजप्रताप सिंह, स्शास्त्र प्रहरी बलका महानिरीक्षक राजु अर्याल, अख्तियार दुरुपयोग अनुसन्धान आयोग प्रमुख प्रेमकुमार राई, प्रतिनिधि सभा एवं राष्ट्रिय सभाका सांसदहरू, नेपाली सेनाका उच्च पदस्थ अधिकारी, नेपाल सरकारका सचिव, नेपाल प्रहरीका उच्च पदस्थ अधिकारीहरूलाई टीका लगाइदिएकी हुन् ।
राष्ट्रपति भण्डारीले आज दिउँसो २ बजेदेखि ३ बजेसम्म विशिष्ट र ३ बजेपछि सर्वसाधारणलाई टीका तथा जमरा लगाइदिएकी हुन् । यसअघि विजया दशमीको शुभसाइतमा राष्ट्रपति भण्डारीले परिवार र आफन्तलाई टीका र जमरा लगाइदिएकी थिइन् । उनले भने गुरूहरू देवराज अर्याल र खेमचन्द्र ढकालको हातबाट दसैँको टीका ग्रहण गरेकी थिइन् ।
